З Кіева ў Данбас выехала калона з гуманітарнай дапамогай

Калона з 19 грузавікоў з гуманітарнай дапамогай для жыхароў Луганскай і Данецкай абласцей адправілася з Кіева.

Выезд кантраляваў міністр інфраструктуры Украіны Максім Бурбак і ўпаўнаважаная прэзідэнта Украіны для ўрэгулявання сітуацыі на ўсходзе Ірына Герашчанка, інфармуе "Інтэрфакс-Украіна".

Максім Бурбак у каментары журналістам нагадаў, што аналагічныя калоны выехалі ў чацвер з Харкава і Днепрапятроўска, агульная колькасць грузавікоў складае 71 аўтамабіль, з агульным грузам вагой 773 тоны, у грузавіках прадукты харчавання (крупы, цукар, кансервы), сродкі першай неабходнасці.

Міністр адзначыў, што будуць прынятыя ўсе меры для забеспячэння бяспекі руху калоны, але паколькі гэта гуманітарны груз, вайскоўцы для забеспячэння бяспекі калоны не будуць задзейнічаныя.

Месцам прызначэння калон з гэтым грузам вызначаны горад Старабельск (Луганская вобласць), дзе яго, у адпаведнасці з міжнароднымі нормамі прымуць прадстаўнікі Міжнароднага Камітэта Чырвонага Крыжа. Чырвоны Крыж будзе размяркоўваць гэтую дапамогу сярод цывільнага насельніцтва Данецкай і Луганскай абласцей, якія апынуліся на кантраляваных баявікамі тэрыторыях.

Фота: facebook.com/iryna.gerashchenko