У менскіх паліклініках недахоп лекараў

У Менск прыязджаюць працаваць лекары з рэгіёнаў, але ў паліклініках па-ранейшаму не хапае медперсаналу.

У 10-й гарадской паліклініцы з 1 жніўня прыступілі да працы (пасля праходжання інтэрнатуры) выпускнікі медыцынскіх ВНУ: пяць участковых тэрапеўтаў, два хірургі (з іх адзін дзіцячы), лекар-траўматолаг, лекар акушэр-гінеколаг, лекар-рэнтгенолаг.

Усяго 10 маладых спецыялістаў. З папаўненнем укамплектаванасць лекарамі ў гэтай медустанове склала 86%. Пры цяперашнім кадравым голадзе ў ахове здароўя гэта ўжо дасягненне, пішуць minsknews.by.

- У нашу паліклініку моладзь ідзе, у тым ліку з рэгіёнаў: нядаўна аформілі на пасаду ўчастковага тэрапеўта лекара з Оршы, а доктара з Беразіно ўзялі эндакрынолагам, - патлумачыла галоўная лекарка 10-й гарадской паліклінікі Святлана Цабкала. - Адпрацаваўшы паводле размеркавання, яны прыехалі ў сталіцу.

У Менску дастаткова паліклінік, дзе спецыялістаў прымуць з распасцёртымі абдымкамі. Аднак пры выбары маладыя людзі спыняюцца на 10-й. Па-першае, новая. Па-другое, прасунутая ў плане інфарматызацыі: усе працоўныя месцы лекараў камп'ютэрызаваныя. Спраўна працуе сістэма ўнутранага электроннага дакументаабароту. На кожнага пацыента заведзеная электронная медыцынская амбулаторная карта, якая аналагічна друкаванаму варыянту пастаянна абнаўляецца звесткамі лабараторных, ультрагукавых або рэнтгеналагічных даследаванняў і іншымі важнымі звесткамі, без якіх нельга паставіць дыягназ і прызначыць правільнае лячэнне. Рэцэпт пацыенту таксама набіраюць на кампутары, а пасля выводзяць на друкарку.

- Маладым спецыялістам штомесяц даецца надбаўка паводле кантракту ў памеры 50% да службовага акладу, - працягнула галоўная лекарка. - Акрамя таго, у адпаведнасці з калектыўным дагаворам нашай паліклінікі пры прыёме на працу маладому спецыялісту адначасова выплачваецца грашовая дапамога (5 базавых велічыняў). Які прыбыў па размеркаванні з рэгіёнаў даем пад'ёмныя (больш за 1 млн руб). Ды і апошнюю стыпендыю новаспечаныя спецыялісты атрымліваюць часцей за ўсё па новым месцы працы - у паліклініцы (700-800 тыс руб). Ставім на чаргу на жыллё. 4 сям'і ўжо атрымалі ключы ад кватэр у новых інтэрнатах.

Прэферэнцыі ёсць і для тых, хто застаўся ў паліклініцы пасля адпрацоўкі, адна з іх - кар'ерны рост. Так, лекара-неўролага, якая паступіла ў клінічную ардынатуру, прызначылі загадчыцай аддзяленнем. Нагадаем, некалькі гадоў таму была прынятая пастанова залічваць год інтэрнатуры як адпрацоўку па размеркаванні. Яшчэ год адпрацоўкі, і малады спецыяліст можа атрымаць другую кваліфікацыйную катэгорыю, што дае прыбаўку да зарплаты і магчымасць кар'ернага росту. Калі застанецца ў дзяржаўнай ахове здароўя.

Але калі з лекарамі сітуацыя яшчэ прымальны, то з маладымі спецыялістамі з сярэдняй медыцынскай адукацыяй складаней.

- Узялі шэсць чалавек: двух медсёстраў, траіх фельчараў-акушэраў, аднаго фельчара-лабаранта. Асабіста ездзіла на размеркаванне ў медкаледж, угаворвала, - не хавае Святлана Іванаўна. - Тым не менш укамплектаванасць кадрамі па сярэднім медперсаналу застаецца ў нас невысокай - 66%. У калегаў тыя ж праблемы.

Аднак прасвет ёсць: сёлета ў Міжнародны дзень медсёстры (адзначаюць 12 траўня) запрасілі школьнікаў, распавялі ім што ды як. Семярых зацікавілі: выдалі ім мэтавыя накіраванні на паступленне ў медкаледжы. Атрымаюць дыплом - прыйдуць працаваць.