Амерыканец інсцэніраваў смерць, каб пазбегнуць вяселля

Грамадзянін ЗША Такер Блэндфорд інсцэніраваў сваю смерць, каб пазбегнуць вяселля з дзяўчынай Алекс Ланчэстар з Вялікабрытаніі.

Пра гэта 18 жніўня паведамляе брытанскае выданне The Daily Mail.

Маладыя людзі, абодвум па 23 гады, пазнаёміліся ў Канектыкуцкім універсітэце ў жніўні 2012 года. Алекс уладкавалася на працу ў кінатэатр, які працуе на тэрыторыі кампуса, і ў той жа дзень пазнаёмілася з Такер, які вучыўся на мастака, піша NEWSru.com.

Іх знаёмства перарасло ў любоўны раман. Правёўшы год разам з маладым чалавекам у ЗША, Алекс пачала збірацца на радзіму, але Такер зрабіў ёй прапанову. Некалькі дзён пасля гэтага, са слоў дзяўчыны, яны толькі і рабілі, што казалі пра тое, як згуляюць вяселле.

Калі Алекс прыляцела ў Вялікабрытанію, яна пачала рыхтавацца да вяселля ўжо не на словах, а на справе. Яна замовіла на eBay вясельную сукенку, выкананую майстрам, выдаткавала блізу 600 фунтаў стэрлінгаў на аплату паслуг фатографаў і нават прапанавала Такеру аплаціць ягоны пералёт у Брытанію, каб ён дапамог ёй з падрыхтоўкамі.

Аднак праз некаторы час ёй патэлефанаваў чалавек, які прадставіўся бацькам маладога чалавека. Ён сказаў, што Такер загінуў у дарожна-транспартным здарэнні. Са слоў мужчыны, апошнія некалькі дзён юнак быў у глыбокай дэпрэсіі. «Бацька» паскардзіўся нявесце на тое, што своечасова не адвёў Такера да псіхіятра.

Алекс цяжка перанесла навіну пра гібель жаніха. Як толькі дзяўчына акрыяла ад страты, яна наважылася патэлефанаваць маці Такера, але якое ж было яе здзіўленне, калі Алекс даведалася ад маці, што з яе сынам усё ў поўным парадку. Цяпер дзяўчына прызнаецца, што яе вера ў стасункі падарваная, і яна не ведае, калі зможа зноў сур'ёзна думаць пра вяселле.

Журналісты The Daily Mail датэлефанаваліся да Такера, каб зразумець сапраўдныя матывы ягонага ўчынку. «Я жудасны чалавек. Я ведаю, што не павінен быў казаць ёй, што я мёртвы, але я не ведаў, што яшчэ рабіць. Алекс дзіўная дзяўчына, але я спалохаўся і хацеў спыніць нашы стасункі». «Я проста не мог сказаць праўду», - прызнаўся малады чалавек.