Санкцыі Пуціна ўзнялі кошты на прадукты ў Расеі
25- 19.08.2014, 10:41
- 16,596
На Сахаліне рост кошту курыных кумпячкоў дасягнуў 60%.
Нягледзячы на запэўніванні федэральных уладаў, што санкцыі ў дачыненні да прадукцыі з ЕЗ і ЗША наўрад ці негатыўна адаб'юцца на спажыўцах, у Маскве і рэгіёнах пачалі расці аптовыя кошты некаторых тавараў, піша "Коммерсант".
Так, у сталіцы РФ свініна для мясаперапрацоўчых камбінатаў падаражэла на 6%. Але адчувальна кошты змяніліся ў Прымор'і, дзе некаторыя віды рыбы падаражэлі на 40%. Рэкорд пабіла Сахалінская вобласць, дзе рост кошту курыных кумпячкоў дасягнуў 60%.
Са слоў чыноўніка, мясцовыя рытэйлеры тлумачаць рост тым, што падвысіліся аптовыя кошты ў Прыморскім краі, які з'яўляецца асноўным пастаўніком прадуктаў на Сахалін. Так, у Прымор'е мяса падаражэла на 26%, некаторыя віды рыбы - на 40%, імпартуемыя з Кітая яблыкі - амаль на траціну, паведамілі апытаныя "Коммерсанта" прадстаўнікі гандлёвых сетак Сахаліна. На выспе раздробныя кошты прадуктаў харчавання павялічыліся на 3-60%.
7 жніўня ўрад РФ абвясціў спіс аграпрадукцыі з ЕЗ, ЗША, Аўстраліі і Нарвэгіі, якая цяпер забароненая для ўвозу ў Расею, - у спісе ўся гародніна і садавіна, рыба, малако і малочная прадукцыя, свініна, ялавічына і мяса птушкі. Спіс шырэйшы і больш жорсткі, чым меркавалася, ён закранае экспарт на суму блізу $10 млрд. У Маскве аналіз коштаў праводзіцца штодня, сур'ёзнага дэфіцыту і, такім чынам, адчувальнага росту коштаў прадуктаў харчавання не назіраецца, заявіў кіраўнік сталічнага дэпартамента гандлю і паслуг Аляксей Немярук.
У той жа час, са слоў чыноўніка, за дзесяць дзён з моманту ўводу санкцый падаражэла сыравіна для маскоўскіх мясаперапрацоўчых камбінатаў: так, кошт паўтушы свініны вырас на 6%, да 180 руб. Немярук дадаў, што да зімы можа падаражэць малако, якое выкарыстоўваецца ў тым ліку ў вытворчасці сыроў. Ахалоджаная рыба, якая дастаўлялася ў Маскву з Нарвэгіі і ЕЗ, сканчаецца, але кіраўнік дэпартамента разлічвае на хуткія пастаўкі з Аргентыны і Чылі.
Вытворцы харчавання з Еўразвязу спрабуюць знайсці новыя каналы збыту сваёй прадукцыі ў Расеі, вынікае з учорашняга заявы кіраўніка Рассельгаснагляду Сяргея Данкверта. Яго ўстанова некалькі дзён запар фіксавала пастаўкі ў Расею праз Беларусь партый яблыкаў, персікаў, сліў, таматаў нібыта з Турцыі, Сербіі, Македоніі і нават Зімбабвэ, у дачыненні да якіх санкцыі не ўведзеныя. Але напраўду гэта - прадукцыя з Польшчы, Славеніі, Нідэрландаў, Літвы. Віцэ-прэм'ер Аркадзь Дварковіч паведаміў, што ўдзельнікі Мытнага саюза, куды акрамя Расеі ўваходзіць Беларусь і Казахстан, змогуць пастаўляць у РФ прадукцыю з ЕЗ ці ЗША, але высокай ступені перапрацоўкі.