Экс-дзяржсакратар ЗША: Расея ўжо ўварвалася ва Украіну

Былы дзяржсакратар ЗША Строўб Тэлбат мяркуе, што Расея ўжо не хавае свайго ўварвання ва Украіну, але вынікам такіх дзеянняў будзе параза Пуціна.

Пра гэта ён сказаў падчас выступу ў адным з вядучых амерыканскіх стратэгічных «мазгавых цэнтраў» - Інстытуце Брукінгса, які сам Тэлбат цяпер узначальвае, перадае «Радыё Свабода».

«Мы павінны перастаць думаць у тэрмінах таго, што мы будзем рабіць, калі Расея фактычна ўрываецца ва Украіну. Расея ўжо ўварвалася ва Украіну. Яны зрабілі гэта часткамі - праз «зялёных чалавечкаў», і некаторы час гэта магло быць апісана як таемнае ўварванне. Гэта больш не з'яўляецца таямніцай, і Пуцін саступіць, расейцы агулам зазнаюць паразу», - адзначыў Тэлбат.

Нагадаем, ЗША, краіны Еўразвязу і некалькі іншых дзяржаў свету ўвялі супраць Расеі некалькі этапаў санкцый праз анэксію Крыма і далейшыя дзеянні супраць Украіны. Цяпер гэта не змяніла палітыку Пуціна да Кіева.

Краіны Захаду і Украіна абвінавачваюць Маскву ў пастаўцы зброі і баевікоў на Данбас. Расейская ўлада гэтыя абвінавачванні адмаўляе.