Берасцеец зарабіў 6 мільярдаў на гульні ў покер

У жыхара Берасця зарэгістраваная найбольшая сума даходу сярод фізічных асоб паводле вынікаў 2013 года ў вобласці.

Ён зарабіў на гульні ў покер онлайн за мяжой Br6,1 млрд, паведаміла БелТА начальніца аддзела падаткаабкладання фізічных асоб інспекцыі МПЗ Берасцейскай вобласці Алена Жукава.

Малады чалавек у добраахвотным парадку падаў у падатковы орган дэкларацыю і заплаціў падаходны падатак у суме Br730 млн. Аналагічным чынам паступілі два жыхары Ганцавічаў, чый агульны выйгрыш у інтэрнэт-казіно склаў Br254 млн, а агульная сума падаткаў - Br30,5 млн.

Гульня ў покер у сеціве становіцца ўсё больш папулярнай у жыхароў вобласці, асабліва сярод моладзі, адзначыла Алена Жукава. Разам з тым дэклараваць даходы з-за мяжы спяшаюцца далёка не ўсё. У тых жа Ганцавічах у дачыненні да аднаго жыхара двойчы, у 2013 і 2014 гадах, устаноўленыя факты несвоечасовага прадстаўлення падатковай дэкларацыі і выплаты падатку. У такім жа парушэнні абвінавачаны і прыцягнуты да адказнасці жыхар Берасця, які на цягам 2012-2013 гадоў неаднаразова атрымліваў пераводы з-за мяжы за выйгрышы ад гульні ў покер.

Не рэдкасць сярод замежных даходаў дывідэнды ад акцый, продажу нерухомасці і доляй уласнасці, удзелу ў электронных таргах на біржы, грашовыя пераводы ў выглядзе дарэння. Так, жыхарка Кобрына ў 2012-2013 гадах атрымлівала грашовыя пераводы з-за мяжы ад грамадзян, якія не з'яўляюцца блізкімі сваякамі. Ёй выстаўленыя да выплаты больш як Br145 млн падаходнага падатку і Br15 млн пені за несвоечасовую выплату. Акрамя таго, яна прыцягнутая да адміністрацыйнай адказнасці.

Выяўленне фізічных асоб, якія атрымалі даходы з-за мяжы або за мяжой і ўхіліліся ад выплаты падаткаў, з'яўляецца важным накірункам у рабоце падатковых органаў, заўважыла Алена Жукава. За студзень-ліпень гэтага года ўстаноўлена 89 такіх грамадзян, ім даналічана Br367,4 млн. За гэты ж перыяд 2,5 тысячы жыхароў вобласці ў добраахвотным парадку падалі падатковыя дэкларацыі аб даходах з-за мяжы, паводле якіх выстаўленыя да выплаты Br4,7 млрд.