Гендырэктар Oz.by: Ніякая кніга не можа быць «дрэннай»

Андрэй Грыневіч апраўдвае продаж у беларускай інтэрнэт-краме кніг пра расейскага дыверсанта Гіркіна.

Гэта вынікае з ліста, атрыманага ад яго рэдакцыяй сайта charter97.org. Андрэй Грыневіч пракамэнтаваў скандал, звязаны з продажам кніг пра Ігара Гіркіна ў краме, генэральным дырэктарам якой ён з'яўляецца.

«Апошнім часам вакол імя нашай кампаніі разгарэліся нежартоўныя спрэчкі, - піша ён. - Прычынай таму паслужылі выстаўленыя ў продаж кнігі на (вострую і балючую для ўсіх нас) тэму вайны ва Украіне, а таксама некарэктнае выказванне ў сеціве аднаго з нашых супрацоўнікаў, які выказаў сваё асабістае меркаванне, выдаўшы яго за меркаванне кампаніі.

Я хачу прынесці шчырыя прабачэнні ўсім, чые пачуцці былі закранутыя гэтымі падзеямі, і патлумачыць нашу пазіцыю:

Наш інтэрнэт-крама ніколі не была і не будзе палітычным праектам. Мы не падтрымліваем тыя ці іншыя палітычныя партыі і не з'яўляемся пляцоўкай для выказвання якіх-небудзь палітычных пунктаў гледжання. Наша дзейнасць носіць камэрцыйны характар і мае зусім іншыя, адрозныя ад палітычных, мэты».

Інтэрнэт-крама Oz.by, са слоў Андрэя Грыневіча, - нэйтральная гандлёвая арганізацыя, і яе задача - даць максімальны выбар для пакупнікоў.

«Нашы кліенты самі фармуюць сваю пазіцыю ў тых ці іншых пытаннях і выбіраюць, што купляць або не купляць, - піша ён. - Oz.by прадае кнігі ды іншую прадукцыю, дазволеную заканадаўствам Рэспублікі Беларусь. Пра тое, што можна ці нельга прадаваць на тэрыторыі краіны, прымаюць пастановы спецыяльныя дзяржаўныя органы.

Мы 15 гадоў працуем на рынку друкаванай прадукцыі і з'яўляемся заўзятымі чытачамі і вялікімі прыхільнікамі Кніг. На думку Oz.by, ніякая Кніга не можа быць «дрэннай», і тым больш мы не прэтэндуем на ролю цэнзараў.

Яшчэ раз прыношу прабачэнні ад імя Інтэрнэт-крамы Oz.by. Я абяцаю, што, як і раней, мы будзем даваць сваім пакупнікам максімальны выбар дазволеных у Рэспубліцы Беларусь тавараў. Бо мы працуем для таго, каб прыносіць радасць нашым кліентам».

Нагадаем, раніцай 21 жніўня з сайта найбуйнейшай беларускай інтэрнэт-крамы Oz.by зніклі кнігі «Абарона Данбаса. Ігар Стралкоў - жах бандэраўскай хунты» і «Крым навекі з Расеяй. Гістарычна-прававое абгрунтаванне ўз'яднання рэспублікі Крым і горада Севастопаль з Расейскай Федэрацыяй».

Яны з'явіліся ў продажу некалькі дзён таму. Дзесяткі чытачоў абурыліся, што адыёзныя расейскія выданні прадае беларускі пляцоўка.

Пад кнігай пра тэрарыста Гіркіна (у анатацыі яго называлі «гонар, розум і сумленне расейскага народа») негатыўных камэнтароў было больш за пяцьдзесят, перш чым яе знялі з продажу. Выданне пра «расейскі Крым» прастаяла крыху даўжэй.

Фота: citydog.by