Расейскія СМІ: Пуцін прыдумаў новага персанажа для «Спокойной ночи, малыши!»

Для праграмы «Спокойной ночи, малыши!» прыдумалі новага персанажа, які з'явіцца ў кастрычніку.

Ідэя для героя была падказана прэзідэнтам Расеі Уладзімірам Пуціным, распавёў РІА Новости Аляксандр Мітрашэнка, старшыня рады дырэктараў тэлекампаніі «Класс!», якая выпускае дзіцячую перадачу.

«Мы пачалі працаваць над пошукам новага лялечнага персанажа даўно, перабралі шмат варыянтаў, але, скажу шчыра, ідэя новага героя была падказаная нашым прэзідэнтам. Спачатку яна здалася трохі нечаканай, але, калі мы ўважліва прыгледзеліся, зразумелі, што гэта траплянне ў дзесятку! Новы герой з'явіцца ў канцы кастрычніка ў эфіры перадачы», - адзначыў Мітрашэнка, які з'яўляецца таксама прадзюсарам перадачы.

Ён таксама сказаў, што калі ўсе персанажы лялечныя, то новы будзе суперсучасным, у 3D - сапраўдны кампутарны герой. «Ён будзе ўсміхацца, вітацца за руку, размаўляць. Гэта ўнікальны праект - злучэнне анімацыі, лялечных персанажаў у адным кадры», - распавёў прадзюсар.

«Праз два тыдні ўсе даведаюцца, што гэта за новы герой і, напэўна, многім стане зразумела, якое дачыненне прэзідэнт мае да гэтай гісторыі», - падкрэсліў Мітрашэнка.

Тэлеперадача «Спокойной ночи, малыши!» ўпершыню выйшла ў эфір 50 гадоў таму. Сцэнары пачалі пісацца ў 1963 годзе. Тады ж сталі з'яўляцца эскізы дэкарацый і лялек галоўных герояў, распрацоўвацца канцэпцыя. У эфір праграма выйшла 1 верасня 1964.