Навукоўцы навучыліся сціраць дрэнныя ўспаміны з дапамогай святла

Адкрыццё можа дапамагчы ў лячэнні фобій.

Неўролагі з Масачусецкага тэхналагічнага інстытута (MIT), падобна, развянчалі распаўсюджаную ісціну пра тое, што дрэннае запамінаецца лепш за добрае. Яны знайшлі спосаб пазбаўляць людзей ад дрэнных успамінаў. Праўда, варта адразу абмовіцца, што метад, які дапамагае ператварыць траўматычныя ўспаміны ў станоўчыя, пакуль выпрабоўваецца на мышах. Але навукоўцы спадзяюцца, што надыдзе час, калі яны змогуць пазбаўляць людзей ад фобій і дэпрэсій, сціраючы негатыўныя ўспаміны, піша «Комсомольская правда».

Навукоўцы ўпершыню знайшлі спосаб уздзейнічаць на памяць і кіраваць успамінамі. Раней пра гэта казалі і пісалі толькі паэты і кінематаграфісты. Метад, распрацаваны амерыканскімі неўролагамі, агулам падобны на працу нейралізатара (сціральніка памяці). Навукоўцы ўздзейнічаюць на памяць, як героі Томі Лі Джоўнса і Уіла Сміта, пры дапамозе яркага святла.

Навукоўцы з MIT выявілі сувязь паміж успамінамі і эмоцыямі. Адзін адзіны ўспамін можа стаць прычынай страху, шчасця або ўзбуджэння ў залежнасці ад вобласці мозгу, у якой ён знаходзіцца.

Адной групе лабараторных мышэй самцоў давалі негатыўныя ўспаміны страху, прыціскаючы да лапкі электрод. Іншай групе прышчаплялі станоўчыя ўспаміны, змяшчаючы іх у адну клетку з самкамі.

Па меры фарміравання ўспамінаў навукоўцы сачылі за дзейнасцю мозгу мышэй і ў прыватнасці, за тым, якія нейроны актывізаваліся ў гіпакампе і амігдале, абласцях мозгу, якія адказваюць за ўзнікненне страху і прыемных успамінаў. Затым на тыя ж нейроны дзейнічалі імпульсамі яркага святла. Грызуны дзейнічалі сапраўды гэтак жа, як на першай стадыі даследавання - паказвалі страх або былі шчаслівыя.

Пасля гэтага навукоўцы змянілі даўжыні хваль і ўздзейнічалі ўжо на нейроны ў іншых участках мозгу мышэй. Мышы, якіх раней білі токам, перасталі баяцца, калі ім цяпер свяцілі ў вочы. Мышы, якія раней адчувалі задавальненне, цяпер адчувалі страх.

Цяпер навукоўцы з MIT, піша Daily Mail, праводзяць доследы, пры дапамозе якіх яны хочуць даведацца, ці можа рэактывацыя прыемных успамінаў уплываць на дэпрэсію.