Выставу Ай Вэйвэя ў Вялікай Брытаніі адкрые яго 3D копія

Сам Ай Вэйвэй цяпер знаходзіцца пад хатнім арыштам у Пекіне паводле абвінавачванняў у «эканамічных злачынствах».

Самую буйную на сённяшні дзень брытанскую выставу кітайскага мастака адкрые яго 3D-копія, паведамляе The Guardian. Цырымонія адкрыцця адбудзецца 1 кастрычніка на ўскраіне Вудстака ў палацы Бленхейм, паведамляе Lenta.ru.

На выставе прадэманструюць больш за 50 работ, якія былі створаныя мастаком за апошнія 30 гадоў. Арганізатары папярэдне адправілі аўтару фатаграфіі з падрабязным планам памяшканняў, дзе размесцяцца арт-аб'екты, каб той мог пракантраляваць іх размяшчэнне. Гэтага аказалася недастаткова, і ў рэшце рэшт, з дапамогай сучасных лазерных тэхналогій былі створаныя праекцыі мастака, якія дазволілі яму візуальна перамяшчацца ў прасторы палаца.

Госці выставы ўбачаць дэкаратыўныя талеркі з выявай «кветак свабоды», арт-праект з роварамі, шырока вядомую скульптуру мастака «Змяя», а таксама фігуры іншых жывёл з кітайскага календара. Выстава будзе доўжыцца да 14 снежня 2014 года.

Ай Вэйвэй - сучасны мастак і архітэктар, куратар і крытык, заснавальнік і дырэктар кампаніі China Art Archive & Warehouse. Неаднаразова ў сваіх творчых працах выступаў з крытыкай кітайскага ўрада, за што некалькі разоў адбываў турэмнае зняволенне. У красавіку 2011 года Ай Вэйвэй быў арыштаваны нібыта паводле абвінавачвання ў «эканамічных злачынствах», але афіцыйна кітайскія ўлады прычыну заключэння мастака пад варту так і не назвалі. Праз два месяцы ён быў вызвалены, аднак застаўся пад хатнім арыштам.