Для выезду насельніцтва з зоны АТА створаныя тры калідоры

У штабе АТА распавялі пра шляхі эвакуацыі цывільных грамадзян з Данецка, Луганска і Горлаўкі.

Сілы антытэрарыстычнай аперацыі ва ўсходніх абласцях Украіны заявілі аб стварэнні гуманітарных калідораў з Данецка, Луганска і Горлаўкі для эвакуацыі цывільных жыхароў. Пра гэта паведамляе прэс-цэнтр АТА на сваёй старонцы ў "Фэйсбуку" ў панядзелак, 4 жніўня.

"Паводле нормаў Міжнароднага гуманітарнага права (правы вайны) ва ўмовах баявых дзеянняў у населеных пунктах, іх жыхарам даецца гуманітарны калідор для выхаду ў бяспечныя раёны... Камандаванне АТА разглядае за патрэбнае вызначыць такія гуманітарныя калідоры для выхаду цывільнага насельніцтва", - адзначана ў паведамленні.

У прэс-цэнтры заявілі аб стварэнні трох калідораў:

- З Данецка (Ленінскім праспектам да аб'язной дарогі, далей трасай Данецк – Курахава праз Мар’інку);

- З Горлаўкі (праспектам Леніна, вул.Маршала Жукава, вул.Айчынная, вул.Пляханава і далей шашой Горлаўка - Дружкоўка праз Дзяржынск)

- З Луганска (вул.Савецкая, вул.16-я лінія, вул.Фрунзе, вул.Шаўчэнкі, вул.7-я лінія, вул.Камінтэрна, далей шашой Луганск - Шчасце праз Металіст).

"Апазнавальным знакам для цывільнага насельніцтва з'яўляецца белае палотнішча для груп людзей і шырокая белая павязка на рукаве ў кожнага грамадзяніна. З сабой жыхары гарадоў могуць вывозіць асабістыя рэчы. Агонь на адлегласці 200 м налева направа ад названых калідораў спыняецца з 10:00 да 14:00 штодня", - распавялі ў прэс-цэнтры.