На час «бітвы за ўраджай» у Слуцку знялі абмежаванні на гандаль спіртным

З сярэдзіны ліпеня ў Слуцкім раёне былі скасаваныя ўсе абмежаванні часу продажу алкаголю.

Цяпер набыць спіртное можна фактычна 24 гадзіны на дзень. Раней гэта можна было зрабіць толькі з 9.00 да 21.00. Звычайна падчас уборачнай кампаніі продаж спіртных напояў абмяжоўваюць, а ў гэтым годзе, наадварот, абмежаванні знялі адначасова з пачаткам жніва. Пра гэта сайту charter97.org паведамілі ў прэс-службе аргкамітэта для стварэння партыі «Беларуская хрысціянская дэмакратыя».

У ідэалагічным аддзеле Слуцкага райвыканкама як-небудзь пракаментаваць сітуацыю адмовіліся. На пытанне: «Як скасаванне абмежаванняў часу продажу алкаголю стасуецца з дзяржаўнай праграмай дзеянняў для папярэджання і пераадолення п'янства і алкагалізму на 2011-2015 гады?» Адказ намесніцы кіраўніка ў эканоміцы Слуцкага райвыканкама Алы Русак быў наступным: «Што за пытанні могуць быць? Усё ўзгадняецца».

На думку каардынатара БХД Мікалая Курыльчыка, слуцкія ўлады працуюць не для людзей, а супраць іх. «Працягваць спрыяць спажыванню алкаголю ў Беларусі - проста здзек над людзьмі. А гандляваць напоўніцу ў жніво - сапраўднае злачынства. Пакуль прыярытэтам застаецца камерцыйны даход вузкага круга бізнэсоўцаў і чыноўнікаў, Беларусь будзе і далей губляць свой патэнцыял, спайваць і дэградаваць», - адзначыў ён.

Нагадаем, паводле звестак сусветнай арганізацыі аховы здароўя (СААЗ), Беларусь займае першае месца ў свеце ў спажыванні алкаголю на душу насельніцтва - 17, 5 літра чыстага алкаголю на чалавека ў год (у разлік бярэцца насельніцтва ва ўзросце ад 15 гадоў). Прытым, калі гэты паказчык перасягае 8 літраў на чалавека ў год, кажуць пра дэградацыю насельніцтва. Свае даклады СААЗ рыхтуе паводле афіцыйных звестак Беларусі.