Анамальная спякота спадзе на наступным тыдні

У другой палове наступнага тыдня анамальная спёка ў Беларусі сыдзе.

Пра гэта паведаміла карэспандэнту БелТА галоўны сіноптык Рэспубліканскага гідраметэацэнтра Людміла Парашчук.

"Слупкі тэрмометраў у дзённыя гадзіны на гэтым тыдні ў асноўным знаходзяцца ў межах плюс 28-31 градус", - сказала Людміла Парашчук. Такі тэмпературны рэжым перасягае норму на 3-5 градусаў. Паводле папярэдняга прагнозу, у другой палове наступнага тыдня на тэрыторыі рэспублікі ўсталюецца звычайнае для жніўня надвор'е. "Уначы будзе плюс 10-16 градусаў, удзень - ад 20 да 27 цяпла", - адзначыла галоўны сіноптык.

Бліжэйшыя дні ўмовы надвор'я на тэрыторыі Беларусі працягне вызначаць цёплая няўстойлівая паветраная маса. Уночы будзе пераважна без ападкаў, удзень месцамі пройдуць кароткачасовыя дажджы, грымнуць навальніцы. Пры навальніцах чакаецца ўзмацненне ветру з парывамі да 15-18 метраў у секунду. Тэмпература паветра ўначы складзе плюс 12-18 градусаў, у дзённыя гадзіны паветра прагрэецца да 27-32 градусаў цяпла.

"На выходных надвор'е на тэрыторыі рэспублікі абумовіць малаактыўны атмасферны фронт, які павольна змяшчаецца з тэрыторыі Польшчы", - сказала прадстаўніца гідраметэацэнтра. Пад яго уплывам у суботу месцамі, пераважна ў заходніх раёнах, пройдуць кароткачасовыя дажджы, прагрымяць навальніцы. Тэмпература паветра ўначы складзе плюс 12-19 градусаў, у дзённыя гадзіны чакаецца ад плюс 24 градусаў на захадзе да 32 цяпла на паўднёвым усходзе краіны.

У нядзелю кароткачасовыя дажджы з навальніцамі чакаюцца месцамі. Тэмпература паветра ўначы складзе плюс 10-17 градусаў, удзень паветра прагрэецца ад 24 да 30 градусаў цяпла.

"У панядзелак з ростам атмасфернага ціску ў многіх рэгіёнах Беларусі стане менш аблокаў, - распавяла Людміла Парашчук. - Пры ўсё яшчэ вялікай працягласці светлавога дня паветра будзе добра прагравацца, таму ў дзённыя гадзіны слупкі тэрмометраў у большасці рэгіёнаў пераадолеюць трыццаціградусную адзнаку". Тэмпература паветра ўначы складзе плюс 10-17 градусаў.

У аўторак і сераду чакаецца перасоўванне на тэрыторыю краіны слабарухомых атмасферных франтоў з Заходняй Еўропы. Пад іх уплывам месцамі пройдуць кароткачасовыя дажджы, прагрымяць навальніцы. Тэмпература паветра ўначы складзе плюс 13-20 градусаў, удзень будзе ад 22 да 28 градусаў цяпла, на паўднёвым усходзе паветра прагрэецца да 29-32 градусаў вышэй за нуль.

Фота: Reuters