Расейскія бамбавікі 16 разоў урываліся ў зону СПА ЗША

За апошнія 10 дзён расейскія бамбавікі больш за 16 разоў урываліся ў зоны апазнавання СПА на паўночным захадзе ЗША.

Аб гэтым піша вайсковы аглядальнік The Washington Free Beacon са спасылкай на чыноўнікаў абароннага міністэрства. Амерыканскія знішчальнікі некалькі разоў на трывогу падымаліся на іх перахоп. Пераклад матэрыялу публікуе Инопресса.ру.

Як паведаміла маёр Бэт Сміт, прадстаўніца Паўночнага камандавання ВС ЗША і Камандавання паветрана-касмічнай абароны ЗША, "бамбавікі выконвалі палёты галоўным чынам уздоўж межаў зоны апазнавання СПА Аляскі, якая затуляе Алеўцкія выспы і кантынентальную тэрыторыю штата, а таксама адзін раз уварваліся ў паветраную прастору Канады".

Сярод расейскіх стратэгічных самалётаў былі заўважаныя цяжкія бамбавікі Ту-95МС, далёкі супрацьлодкавы самалёт Ту-142М і самалёт радыёэлектроннай разведкі Іл-20.

"Палёты бамбавікоў - апошняя праява бразгання ядзернай зброяй з боку расейцаў. Аднак, са слоў іншых чыноўнікаў ад абароны, вялікая колькасць уварванняў у паветраную прастору - ці не звычайная справа і вяртае да часоў халоднай вайны, калі савецкія бамбавікі стараліся прывесці ў дзеянне сродкі СПА ўздоўж межаў ЗША ў якасці падрыхтоўкі да ядзернага канфлікту", - гаворыцца ў артыкуле.

Расейскія стратэгічныя ядзерныя сілы "правяраюць рэакцыю нашай супрацьпаветранай абароны, нашыя сістэмы камандавання і кіравання", - заўважыла інфармаваная крыніца выдання. "Гэта не проста трэніровачныя палёты", - дадала яна.

Кіраўнік Стратэгічнага камандавання ВС ЗША адмірал Сесіл Хэйні выказаў занепакоенасць што да актывізацыі расейскіх ядзерных сіл яшчэ ў чэрвені гэтага года. "Мы назіралі значную прысутнасць расейскіх стратэгічных самалётаў паблізу Японіі, Карэі і нават нашага заходняга ўзбярэжжа, - заявіў ён. - Расея працягвае мадэрнізаваць стратэгічныя магчымасці ўсіх складнікаў сваёй трыяды. У адкрытых крыніцах паведамлялася аб мараходных выпрабаваннях яе найноўшага [падводнага ракетаносца], выпрабавальным запуску новай крылатай ракеты класа паветра-зямля і мадэрнізацыі міжкантынентальных ядзерных ракет для надання ім мабільнасці".

Гэта далёка не першы такі інцыдэнт за апошні час. У красавіку расейскі бамбавік Су-24 некалькі разоў праляцеў паблізу эсмінца ВМС ЗША Donald Cook у Чорным моры. Прадстаўнік Міністэрства абароны палкоўнік Стывен Уорэн назваў гэтыя дзеянні расейскага боку "правакацыйнымі" і "непрафесійнымі".

Таксама ў чэрвені стала вядома аб красавіцкім інцыдэнце над Ахоцкім морам, які замоўчваўся Пентагонам. Амерыканскі самалёт-выведнік, як сцвярджаецца, знаходзіўся за 60 міляў (96 кіламетрах) ад расейскай тэрыторыі. Су-27 пераследваў яго і ў нейкі момант праляцеў усяго за 30 метрах ад RC-135U, нярвуючы амерыканскі экіпаж.