Харкаўчане выйшлі на мітынг супраць Кернэса і «ХНР»

Мэра Харкава Генадзя Кернэса абвінавачваюць у дапамаганні сепаратыстам і Расеі.

У суботу ў другім паводле велічыні населеным пункце Украіны праходзіць мітынг супраць мэра. Пра гэта паведамляюць відавочцы ў сацсетках, інфармуе «Украінская праўда».

Паводле паведамленняў, актывісты раздаюць улёткі, у якіх паказана, што Генадзь Кернэс з'яўляецца памагатым Расеі і рыхтуецца 23 жніўня абвясціць пра стварэнне «Харкаўскай народнай рэспублікі».

На шэсці - блізу 100 чалавек, у тым ліку міліцыянты. Удзельнікі мітынгу таксама падпісвалі лісты ўкраінскім вайскоўцам. Афіцыйная назва мітынгу: «Харкаў без Гепы, а значыць - без вайны», - пішуць мясцовыя жыхары.

Акрамя таго, на нядзелю, 10 жніўня, запланаваны Харкаўскі Еўрамайдан на плошчы Свабоды. Як адзначаюць арганізатары, дыскусійныя тэмы акцыі: як нам памяняць уладу ў Харкаве, пра досвед грамадзянскага супраціву апошняга тыдня і метады кардынальнай змены сістэмы ўлады ў горадзе, як не даць сябе падмануць на выбарах, чаму абавязкова трэба галасаваць, каго выбіраць, калі выбару няма, і што рабіць, каб выбар быў?

Акрамя таго, гаворка пойдзе пра Канстытуцыйную базу самакіравання мясцовай грамады.

Таксама тэмы кірмашу грамадзянскіх ініцыятыў горада: каму належыць зямля ва Украіне, чым кіруюцца тыя, хто жыве на гэтай зямлі, што аб самакіраванні кажа Канстытуцыя, з чаго пачынаецца самакіраванне ў рэальным жыцці і чаму гэта патрэбна грамадзянам краіны.

Абавязкова гаворка пойдзе пра люстрацыю і агульнапалітычную сітуацыю ў краіне. Удзельнікі Еўрамайдана будуць збіраць грошы для арміі і параненых.