Хірург Менскай раённай бальніцы выдаваў «ліпавыя» бальнічныя
17- 9.08.2014, 13:20
- 12,573
Пракуратурай Менскай вобласці ў суд накіраваная крымінальная справа ў дачыненні да хірурга Менскай раённай бальніцы.
Медык абвінавачваецца ў неаднаразовым атрыманні хабараў, службовым падлогу і дапамаганні ва ўхіленні ад прызыву на вайсковую службу, паведамляе БелаПАН.
Як паведаміў намеснік начальніка аддзела ў барацьбе з карупцыяй і арганізаванай злачыннасцю пракуратуры Менскай вобласці Ігар Бычко, падчас правядзення папярэдняга расследавання ўстаноўлена, што медыцынскі работнік браў хабар за выдачу фіктыўных лісткоў непрацаздольнасці. Стаўка хабару складала ад 3 да 5 даляраў за адзін дзень ліпавага бальнічнага лістка.
Са слоў прадстаўніка абласной пракуратуры, незаконная выдача бальнічных насіла сістэматычны характар - усяго ўстаноўлена 22 эпізоды.
Разам з лекарам перад судом стане і ягоны знаёмы, які заплаціў хірургу за садзейнічанне ў атрыманні заведама фальшывага дыягназу пра наяўнасць захворвання, што дазволіла ўхіліцца ад прызыву на тэрміновую вайсковую службу.