Financial Times: На ўсходзе Украіны знішчаныя 12 супрацоўнікаў ГРУ

У сутыкненнях на ўсходзе Украіны загінулі 12 супрацоўнікаў Галоўнага разведвальнага ўпраўлення Генштаба Узброеных сіл Расеі.

Аб гэтым піша выданне Financial Times. Вайсковыя спецназаўцы загінулі ў апошнія некалькі тыдняў, афіцыйна ўсе яны знаходзіліся ў адпачынку, распавяла выданню крыніца, блізкая да выведкі, паведамляе РБК.

Былі паказаныя фота загінулых, вывешаных у адной з вайсковых устаноў Масквы. Перад кожным партрэтам стаіць букет з шасці руж. Выданне сцвярджае, што целы двух вайсковых спецназаўцаў знаходзіліся ў грузавіку з паметкай «Груз 200» [савецкі армейскі тэрмін, які абазначае адпраўку на радзіму целаў загінуўшых у гарачых кропках], фатаграфіі якога прысутнічаюць у чэрвеньскай публікацыі «Новай газеты».

Гэты факт ускосна пацвярджае абвінавачванні ўкраінскіх уладаў, якія заяўляюць, што Расея не толькі падтрымлівае і ўзбройвае ўкраінскіх паўстанцаў, але і, выкарыстоўваючы падраздзялення элітнага спецназа і спецслужбаў, актыўна вядзе сакрэтную вайсковую кампанію ў зоне канфлікту, мяркуе аўтары публікацыі.

Украінскія разведчыкі сабралі шматлікія доказы таго, што ГРУ кіравала дзеяннямі ўкраінскіх паўстанцаў, нагадвае выданне. Разведка заходніх краін згодная з ацэнкай украінскіх сілавікоў адносна «таемнай дзейнасці» расейскіх спецназаўцаў, якая праводзіцца са згоды прэзідэнта Уладзіміра Пуціна, адзначае FT. Высокапастаўлены супрацоўнік службы бяспекі Вялікабрытаніі заявіў выданню, што расейскія вайскоўцы, без сумневу, прысутнічаюць на ўсходзе Украіны.

FT згадвае фатаграфіі ў сацыяльных сетках з вайскоўцамі, абсталяванымі «камплектам жаўнера будучыні» - баявой экіпіроўкай «Ратнік», якую расейская армія ўвяла ў гэтым годзе.

Заходнія вайсковыя аналітыкі мяркуюць, што на ўсходзе Украіны прадэманстраваны «хрэстаматыйны прыклад аперацыі ГРУ». «[Яны] працуюць дакладна, хутка, а затым знікаюць», - сказаў старэйшы афіцэр вайсковай выведкі NATO. «Вельмі цяжка вызначыць, дзе яны знаходзіліся. Гэта спецыялізаваныя войскі», - гаворыць неназваны суразмоўца выдання.

Эксперт Каралеўскага інстытута аб'яднаных службаў у Лондане Ігар Суцягін распавёў: «[Расейскі] спецназ падобны на помесь амерыканскіх рэйнджараў [элітны полк лёгкай пяхоты ЗША] і брытанскай SAS [Асаблівая паветраная служба]». Ён адзначыў, што спецназаўцы праходзяць падрыхтоўку для ўдзелу ў баявых дзеяннях і навучаюцца для разведвальнай працы. «Каб ладзіць мяцяжы. Каб кантраляваць іх. Каб пераправіць зброю. Для вядзення партызанскіх войнаў», - пералічыў ён спектр прымянення байцоў гэтага падраздзялення.

З матэрыялаў заходняй выведкі таксама вынікае, што многае з ўзбраення паступае на ўсход Украіны з запасаў ГРУ.

У той час як падчас крымскай кампаніі сілы расейскага спецназа былі «даволі прыкметна разгорнутыя» на паўвыспе, на ўсходзе Украіны яны дзейнічаюць больш асцярожна - магчыма, Масква вынесла ўрок мінулага.