На выходных у Беларусі - да плюс 26

У дзённыя гадзіны на выходных паветра прагрэецца да 20-26 градусаў цяпла.

Пра гэта паведаміла карэспандэнту БелТА галоўны сіноптык Рэспубліканскага гідраметэацэнтра Людміла Парашчук.

«Учора атмасферны фронт з Заходняй Еўропы паспрабаваў змяніць характар надвор'я ў нашай краіне. Павольна прасоўваючыся на ўсход, ён дайшоў да цэнтральных раёнаў Беларусі, дзе прайшлі моцныя дажджы, - сказала Людміла Парашчук. - Але цяпер пад націскам усходняга антыцыклону фронт павярнуў назад і цяпер вяртаецца на тэрыторыю Польшчы».

Са слоў галоўнага сіноптыка, бліжэйшыя дні і на будучых выходных надвор'е на тэрыторыі рэспублікі будзе фарміравацца пад уплывам вобласці павышанага атмасфернага ціску. Таму будзе пераважна без ападкаў. Уначы і раніцай месцамі магчымы туман. Вецер чакаецца паўднёва-ўсходні слабы. Тэмпература паветра ўначы складзе плюс 7-14 градусаў, у дзённыя гадзіны паветра прагрэецца да 20-26 градусаў цяпла.

«У пачатку наступнага тыдня ўплыў на характар надвор'я ў Беларусі будзе мець скандынаўскі антыцыклон», - распавяла Людміла Парашчук. Пад ягоным уплывам чакаецца перавага сухога надвор'я, пры гэтым на тэрыторыі краіны стане крыху халадней. Тэмпература паветра ўначы складзе плюс 4-9 градусаў, днём паветра прагрэецца да 17-22 градусаў. Крыху цяплей будзе па паўднёвым захадзе, дзе ноччу чакаецца плюс 10-12 градусаў, днём - да 24 градусаў вышэй за нуль.