ЕЗ увядзе санкцыі супраць расейскай нафтавай галіны, абаронкі і пяці банкаў

Новыя санкцыі ўвойдуць у дзеянне 12 верасня.

Еўразвяз пацвердзіў, што новыя санкцыі ўключаюць далейшыя абмежаванні на доступ расейскіх дзяржбанкаў да еўрапейскага капіталу, пашырэнне эмбарга на пастаўку тэхналогій для расейскай нафтавай галіны і павелічэнне спісу асоб, чые актывы ў Еўропе падлягаюць блакаванню, паведамляе РБК.

Пра гэта гаворыцца ў паведамленні Еўрапейскага звязу.

З гэтага часу еўрапейскім грамадзянам і кампаніям забараняецца даваць крэдыты Ашчадбанку, ВТБ, Газпрамбанку, Рассельгасбанку і Знешэканамбанку. Акрамя таго, еўрапейцы не могуць купляць і прадаваць каштоўныя паперы гэтых банкаў з тэрмінам абарачэння больш за 30 дзён (раней забарона была на паперы з тэрмінам больш за 90 дзён). Аналагічная забарона на размяшчэнне пазыковых інструментаў распаўсюджваецца на тры абаронныя прадпрыемствы і тры нафтавыя кампаніі, назвы якіх ЕЗ не раскрывае. Раней Reuters, FT і Wall Street Journal паведамлялі, што гэта «Оборонпром», Аб'яднаная авіябудаўнічымі карпарацыя і «Уралвагонзавод», а таксама Роснефть», «Газпром нефть» і «Транснефть».

Еўрапейскія кампаніі больш не змогуць весці паслугі, неабходныя для арктычных, глыбакаводных і сланцавых нафтавых праектаў у Расеі, у прыватнасці, паслугі ў бурэнні, апрабаванні і выпрабаванні свідравін. Раней пад эмбарга падпадалі толькі некаторыя тавары (трубы, свідравыя ўстаноўкі ды інш) для адпаведных нафтавых праектаў.

ЕЗ таксама забараніў пастаўляць прадукцыю двайнога прызначэння дзевяці расейскім кампаніям, якія занятыя адначасова як у грамадзянскім, так і ў вайсковым сектарах (назвы кампаній будуць апублікаваныя заўтра).

Нарэшце, у «чорны спіс» асоб, якім будзе адмоўлена ва ўездзе ў краіны ЕЗ і чые актывы ў юрысдыкцыі Еўразвязу будуць замарожаны, дабаўлены 24 чалавекі - «людзі, датычныя да дзеянняў супраць тэрытарыяльнай цэласнасці Украіны, уключаючы новае кіраўніцтва Данбаса, сяброў урада Крыма, а таксама расейскіх службовых асоб, адказных за прыняцце пастановаў, і алігархаў».