Жырыноўскі, «Роснефть» і «Транснефть» - пад санкцыямі ЕЗ

ЕЗ апублікаваў новы санкцыйны спіс супраць Расеі.

Еўрапейскі звяз, як і абяцаў, апублікаваў новыя санкцыі ў дачыненні да Расеі, якія з гэтага моманту ўвайшлі ў дзеянне. Амбасадары 28 краін ЕЗ у чацвер прынялі пастанову аб увядзенні з 12 верасня дадатковых санкцый у дачыненні да РФ, піша NEWSru.com.

У новы санкцыйны спіс ЕЗ трапілі кампаніі «Роснефть», «Транснефть», «Газпром нефть», паведамляе афіцыйны часопіс ЕЗ. Таксама Еўразвяз увёў забарону на арганізацыю пазыковага фінансавання для трох найбуйнейшых абаронных канцэрнаў Расеі - «Уралвагонзавода», «Оборонпрома» і Аб'яднанай авіябудаўнічымі карпарацыі (ОАК).

З 31 ліпеня застаўся нязменным спіс банкаў, для якіх уведзены абмежаванні на выдаванне пазык і інвестыцыйных паслуг. Раней у пералік патрапілі Сбербанк, ВТБ, Газпромбанк, ВЭБ и Россельхозбанк. Уведзеныя санкцыі прадугледжваюць забарону для пералічаных кампаній на размяшчэнне аблігацый з тэрмінам пагашэння больш за 30 дзён. Рэзідэнтам ЕЗ таксама забаронена крэдытаваць згаданыя арганізацыі.

У чорны спіс трапілі верхаводы «ДНР» і дэпутаты Дзярждумы

У абноўлены чорны спіс ЕЗ уключаныя 24 чалавекі, у тым ліку генеральны дырэктар карпарацыі «Ростех» Сяргей Чэмезаў, прэм'ер-міністр самаабвешчанай Данецкай народнай рэспублікі Аляксандр Захарчанка, лідэр ЛДПР і дэпутат Дзярждумы Уладзімір Жырыноўскі, а таксама віцэ-спікеры ніжняй палаты расейскага парламенце Уладзімір Васільеў, Іван Мельнікаў, Ігар Лебедзеў, Мікалай Левічаў. Такім чынам, спіс санкцый супраць канкрэтных асоб пашырыўся да 119 чалавек.

Акрамя Захарчанкі, у пералік з ліку верхаводаў сепаратыстаў увайшлі: Уладзімір Конанаў, які займае пост міністра абароны «ДНР», лідэр так званага «Народнага апалчэння» Данбаса Міраслаў Рудэнка, прэм'ер-міністр «ЛНР» Генадзь Цыпкалаў, міністр дзяржаўнай бяспекі «ДНР» Андрэй Пінчук, кіраўнік МУС «ДНР» Алег Бяроза, афіцыйны прадстаўнік «ДНР» у канфэрэнцыі Андрэй Родкін, міністр замежных спраў «ДНР» Аляксандр Караман.

З афіцыйных асоб РФ пад санкцыі таксама патрапілі пастаянны прадстаўнік Крыма пры прэзідэнце РФ Георгій Мурадаў, «віцэ-прэм'ер» Крымскай рэспублікі Міхаіл Шарамет, намеснік старшыні Савета Федэрацыі РФ Юры Вараб'ёў, дэпутат Дзярждумы, вярхоўны атаман Саюза казачых войскаў Расеі і Замежжа Віктар Вадолацкі, сябра прэзідыума ЦК КПРФ і ягоны сакратар у міжнародных і эканамічных сувязях Леанід Калашнікаў, дэпутаты Дзярждумы Уладзімір Нікіцін, Алег Лебедзеў, Святлана Журава, Аляксандр Бабакоў.

Таксама ў чорным спісе апынуўся камандзір 76-й гвардзейскай дэсантна-штурмавой Чарнігаўскай дывізіі (Пскоўская дывізія), генерал-маёр Аляксей Наумец. Нагадаем, што менавіта пра байцоў гэтай дывізіі прэса пісала, што яны бяруць удзел у баявых дзеяннях на баку сепаратыстаў на Украіне.