Мінабароны РФ просяць растлумачыць «дзіўны мор» сярод вайскоўцаў

Ад чаго паміраюць расейскія вайскоўцы, калі іх няма ва Украіне?

Расейская актывістка Алена Васільева звярнулася з заявай да афіцыйнага прадстаўніка міністэрства абароны РФ Ігара Канашэнкава, які раней прылічыў яе да шэрагаў украінскай выведкі.

«Вы павінны ўсведамляць, што падобнай афіцыйнай заявай вы абвінавацілі мяне ледзь не ў здрадзе Радзіме. Вы абавязаны разумець, якую адказнасць гэтым абвінавачваннем узялі на сябе», - напісала ў звароце актывістка, дадаўшы, што «ніколі не служыла ў ніякіх выведках».

У сваім звароце актывістка нагадала Ігару Канашэнкаву, што ён абавязаны ведаць дзе знаходзяцца расейскія вайскоўцы, паведамляе УНІАН.

«Калі вы з'яўляецеся начальнікам прэс-службы міністэрства абароны РФ, то проста абавязаны ведаць, што на вучэннях пад Растовам у шэрагах узброеных сілаў РФ ідзе дзіўны мор», - напісала актывістка, дадаўшы, што замест гэтага «даручаныя вам войскі то заблудзяцца ў суседняй дзяржаве з назвай Украіна, то паедуць у адпачынак на вайсковых танках, а многія яшчэ і «Грады» з сабой у адпачынак бяруць і ладзяць цэлымі дывізіямі адпускнікоў сафары на тэрыторыі незалежнай дзяржавы».

Далей у звароце Алена Васільева пытаецца ў прадстаўніка Мінабароны пра зніклых ваеўнікоў, а таксама просіць растлумачыць абставіны гібелі або раненні вайскоўцаў. У канцы паслання актывістка звяртае ўвагу на тое, што падобная заява Ігара Канашэнкава, заснаваная «на домыслах і плётках», «ганьбіць званне расейскага афіцэра і гонар мундзіра».