Тозік абяцае вывесці «Славянскі базар» на самаакупнасць

Міжнародны фестываль мастацтваў «Славянскі базар у Віцебску» будуць паступова выводзіць на самаакупнасць.

Пра гэта паведамілі ў прэс-службе беларускага ўрада паводле вынікаў пасяджэння аргкамітэта «Славянскага базару», якое прайшло пад старшынствам намесніка прэм'ер-міністра Анатоля Тозіка.

Падчас пасяджэння былі падтрыманыя прапановы аб захаванні існуючай структуры асноўных мерапрыемстваў фестывалю, якія фармуюць яго ўнікальнае творчае аблічча ў сусветным фестывальным руху: гала-канцэрты адкрыцця і закрыцця, канцэрт Дня дружбы «Саюзная дзяржава запрашае», міжнародны конкурс выканаўцаў эстраднай песні, міжнародны дзіцячы музычны конкурс, Дзень моладзі, паведамляе БелТА.

Арганізацыйным камітэтам дадзеныя адпаведныя даручэнні Мінкультуры, ДУ «Цэнтр культуры «Віцебск», Віцебскаму аблвыканкаму і іншым зацікаўленым у прапрацоўцы прапаноў у павышэнні творчага ўзроўню фестывалю з улікам развароту фестывалю да тэлегледача, выхаду на самаакупнасць, пашырэння ўдзелу ў фестывалі прадстаўнікоў славянскіх дзяржаў.

На пасяджэнні падведзеныя вынікі XXIII Міжнароднага фестывалю мастацтваў «Славянскі базар у Віцебску». Практыка паказала, што новы фармат форуму апраўдвае сябе. Павялічылася колькасць краін - удзельніц фестывалю, якія прадстаўлялі не толькі Еўропу, але і Азію, Паўночную і Паўднёвую Амерыку. Лік фестывальных мерапрыемстваў таксама вырас.

У 2014 годзе была змененая канцэпцыя правядзення міжнароднага конкурсу выканаўцаў эстраднай песні (упершыню прадугледжанае правядзенне паўфіналу і двух фінальных канцэртаў з выкананнем славянскага і сусветнага хітоў). Новы фармат конкурсу ўзмацніў міжнародны статус мерапрыемства і даў выканаўцам больш шырокія магчымасці для раскрыцця сваіх галасавых і акторскіх здольнасцей.

Разам з тым правядзенне фестывалю выявіла і некаторыя арганізацыйныя і творчыя праблемы, якія патрабуюць змены падыходаў у рабоце дырэкцыі на падрыхтоўчым этапе.