Таксісты Барселоны пачалі вучыць кітайскую мову
4- 12.09.2014, 18:09
- 5,072
Першая група таксістаў Барселоны, якія жадаюць навучыцца асновам кітайскай мовы, праслухала пачатковы курс гэтага прадмета.
Заняткі былі арганізаваныя асацыяцыяй прафесійных кіроўцаў-перавозчыкаў пасажыраў MyTaxi і міжнароднай кампаніяй Chinese Friendly International, якая спецыялізуецца на кітайскім турызме ў Гішпаніі, піша «Гішпанія па-руску».
Паток турыстаў і бізнэсоўцаў з Паднябеснай у сталіцу Каталоніі пастаянна расце і кітайская мова становіцца прафесійнай неабходнасцю для тых, хто хоча пашырыць сваю кліентуру. Таксісты ўжо атрымалі агульнае ўяўленне аб мінімальным наборы фраз, якія патрабуюцца ў стасунках з пасажырамі з Кітая: яны ведаюць, як адказаць на званок заказчыка, які гаворыць на гэтай мове, як растлумачыць, колькі ён павінен заплаціць за перавозку і г.д. У выпадку цяжкасцяў таксістам на дапамогу прыйдзе ўсталяваны ў іх смартфонах дадатак, які «ўмее» гаварыць на ўсе гэтыя тэмы па-кітайску.
Уводны курс нескладаны, доўжыцца ўсяго дзве гадзіны, але гэтага цалкам дастаткова, каб навучыцца мець стасункі з кліентам пры пасярэдніцтве электроннага перакладчыка.
Арганізатары навучання распавялі таксістам у агульным аб Кітаі, яго культуры, звычках насельніцтва. Вывучэнне мовы, якое паводле жадання навучэнцаў можа быць працягнутае і пашыранае, праводзіцца на бясплатнай аснове.
«Мы спадзяемся, што крок за крокам усё 1800 прафесіяналаў, якія ўваходзяць у нашу асацыяцыю, авалодаюць кітайскай мовай у аб'ёме, неабходным і дастатковым, каб абслугоўваць пасажыраў, якія прыехалі з самай населенай краіны свету», - кажа дырэктар у маркетынгу MyTaxi Сандра Санча.