Акупанты спрабуюць пашырыць межы ДНР і ЛНР ва Украіне

Баевікі і расейскія войскі парушаюць замірэнне ў Данбасе.

13 верасня падчас бою ля аэрапорта Данецка ўкраінскія вайскоўцы знішчылі 12 баевікоў і два танкі. Яшчэ адзін танк быў захоплены. Актывізаваліся атакі расейскіх наймітаў на пазіцыі ўкраінскіх падраздзяленняў з мэтай іх правакавання і выцяснення з займаных межаў. Пра гэта сёння, 15 верасня, на традыцыйным штодзённым брыфінгу паведаміў прадстаўнік Інфармацыйна-аналітычнага цэнтра Рады нацыянальнай бяспекі і абароны Андрэй Лысенка, піша NEWSru.ua.

Паказаныя дзеянні знаходзяцца пад кантролем штаба АТЦ, у выпадку неабходнасці вайскоўцы даюць годны адпор агрэсару.

З боку тэрарыстаў інтэнсіўнасць абстрэлаў украінскіх пазіцый і блок-пастоў не спыняецца. Цягам дня тэрарысты абстралялі пазіцыі і блок-пасты сіл АТА: у Данецкай вобласці - у раёнах населеных пунктаў Ніжняя Крынка, Малаарлоўка, Гранітнае, Крынічная, Краснагароўка, Мар’інка, Старагнатоўка, Аўдзееўка, Пяскі, Верхнетарэцкае і аэрапорта Данецк; у Луганскай вобласці - у раёне Камышэваха, Папасная, Шчасце і Залатога.

14 верасня сілы АТА адбілі спробу прарыву баевікоў пад вёскай Ясінаватая Данецкай вобласці і адкінулі ворага на некалькі кіламетраў ад горада. Баевікі дзейнічалі пад прыкрыццём артылерыі і агню з установак «Град».

Учора а 16:30 у Расею праз Дмітраўку-Дзіброўку вярнулася 7 бензазапраўнікаў у суправаджэнні 2 мікрааўтобусаў.

Населеныя пункты Стараміхайлаўка на заходняй ускраіне Данецка і Патрыятычнае знаходзяцца пад кантролем тэрарыстаў.

Баявых сутыкненняў на ўкраінска-расейскай мяжы не адбывалася. Выпадкаў парушэння паветранай прасторы Украіны не зафіксавана.

У Радзе нацыянальнай бяспекі і абароны Украіны адзначаюць, што сярод украінскіх сілавікоў, якія знаходзяцца на Данбасе, ёсць загінулыя і параненыя за апошнія дзень, але дакладныя звесткі пакуль што ўдакладняюцца.

Нагадаем, 12 верасня пад 20:00 баевікі пачалі маштабны штурм Данецкага аэрапорта. Украінскія вайскоўцы адбілі атаку, але абстрэлы з боку акупантаў працягнуліся.

Увечары 14 верасня актыўныя баі аднавіліся.

Сітуацыя ў населеных пунктах зоны АТА

14 верасня тэрарысты і расейскія вайскоўцы нанеслі артылерыйскія ўдары па жылых кварталах ў Куйбышаўскім і Кіеўскім раёнах Данецка. Ёсць ахвяры сярод мірнага насельніцтва. У выніку гэтых абстрэлаў пашкоджаныя некалькі жылых дамоў, у некаторых пачаліся пажары.

Пад гэтыя абстрэлы трапілі прадстаўнікі спецыяльнай маніторынгавай місіі АБСЕ, якія выконвалі патруляванне ў Кіеўскім раёне Данецка. Гэта прымусіла іх датэрмінова закончыць сваю працу.

Таксама з боку Данецка тэрарысты і расейскія вайскоўцы абстралялі н.п. Мар’інка і з боку Дэбальцэва, Чарнухіна і ўсходнюю частка Сафіеўкі Перавальскага раёна Данецкай вобласці. Сведкамі гэтага сталі мясцовыя жыхары. Гэтыя абстрэлы баевікі спрабуюць выдаць за абстрэлы ўкраінскіх вайскоўцаў.

У Луганску агулам захоўваецца спакойная абстаноўка, аднак горад застаецца часткова без энэрга-і водазабеспячэння, не працуе стацыянарная і мабільная сувязь. У горадзе адчуваецца знаная нястача медработнікаў. З 60 брыгад хуткай дапамогі засталіся толькі 5. Паводле прыблізных падлікаў, у гэты момант у Луганску не стае амаль 80% медперсаналу.

У Марыупалі Данецкай вобласці аб'яднаныя сілы АТА прадаўжаюць узмацняць абарончыя ўмацаванні і дабудоўваюць фартыфікацыйныя збудаванні. Украінскім вайскоўцам актыўна дапамагаюць валанцёры і жыхары горада.

Паводле стану на сёння, у верасні выплаты пенсій і грашовых дапамог праз паштовыя аддзяленні і ўстановы банкаў прафінансаваныя ў 21 раёне і горадзе Данецкай вобласці, а таксама ў 13 раёнах і гарадах Луганскай вобласці. Агульная сума дзяржаўнай дапамогі 226,9 млн грн. Усяго пенсіянерам, сем'ям з дзецьмі, малазабяспечаным сем'ям, інвалідам з дзяцінства і дзецям-інвалідам у Данецкай і Луганскай ужо выплачаныя 111,5 млн грыўняў.