Украінскае войска і войскі NATO пачалі супольныя вучэнні

Амаль 1300 вайскоўцаў з 15 краін пачалі вучэнні недалёка ад Львова.

Пентагон заяўляе, што вучэнні былі запланаваныя яшчэ да пачатку цяперашняга крызісу на ўсходзе Украіны, перадае BBC.

У манеўрах, названых "Хуткі трызубец", прымаюць удзел амаль 200 амерыканскіх вайскоўцаў, а таксама вайскоўцы з некалькіх краін NATO і ўсходнееўрапейскіх краін, якія ўваходзяць у праграму NATO "Партнёрства дзеля міру".

Тым часам, нягледзячы на ўзгодненае 5 верасня замірэнне, на ўсходзе Украіны - асабліва ў раёне Данецка - доўжацца сутыкненні. У мінулыя выходныя некалькі раёнаў горада зазналі артылерыйскі ды мінамётны абстрэл. Як войска Украіны, так і сепаратысты вінавацяць адзін аднаго ў парушэнні пагаднення аб спыненні агню.

Гарадская адміністрацыя Данецка паведамляе, што за выходныя загінулі шэсць чалавек, і яшчэ 15 атрымалі раны.

NATO сцвярджае, што амаль тысяча добра ўзброеных расейскіх вайскоўцаў усё яшчэ знаходзяцца на тэрыторыі Украіны, а з расейскага боку мяжы сканцэнтраваныя яшчэ 20 тысяч чалавек.

У пачатку верасня Паўночнаатлантычны альянс абвясціў аб намеры стварыць сілы хуткага рэагавання, якія могуць быць задзейнічаны ў кожным канфлікце цягам двух дзён.

Многія краіны-чальцы NATO ва ўсходняй частцы Еўропы асцерагаюцца магчымай агрэсіі з боку Расеі.