МУС прапаноўвае штрафаваць за наркатычнае ап'яненне

У законапраекце аб узмацненні жорсткасці барацьбы з наркотыкамі прадугледжана адказнасць за знаходжанне ў стане наркатычнага ап'янення.

Пра гэта паведаміў сёння ў Віцебску журналістам намеснік начальніка ўпраўлення ў наркакантролі і супрацьдзеянні гандлю людзьмі МУС Беларусі Васіль Лосіч, паведамляе БелТА.

«Гэта норма дасць магчымасць выцягнуць з ценю наркаспажыўцоў, улічваць іх і праводзіць мерапрыемствы прафілактычнага характару», - упэўнены ён.

Законапраект аб узмацненні жорсткасці барацьбы з наркотыкамі плануецца да разгляду парламентарыямі ў восеньскую сесію. У дакуменце таксама прапануецца ўзмацніць крымінальную адказнасць за збыт наркотыкаў заведама непаўналетнім, а таксама за вытворчасць наркотыкаў ва ўмовах лабараторыі, даецца азначэнне, што такое лабараторыя.

«Два гады таму ў рэспубліцы заканадаўча было ўведзена паняцце «аналагі». Новы законапраект аб узмацненні жорсткасці барацьбы з наркотыкамі пашырае гэта паняцце і ўводзіць новае «базавая структурная велічыня», што дазволіць ахапіць больш шырокі спектр рэчываў і на 95% аўтаматычна перакрываць новыя віды наркотыкаў», - сказаў Васіль Лосіч.

У параўнанні з мінулым годам колькасць крымінальных спраў, распачатых за абарот наркотыкаў у Беларусі, павялічылася на 1,7 тыс. «Практычна ў 5 разоў павялічылася колькасць крымінальных спраў што да наркотыкаў, дзе фігурантамі з'яўляюцца непаўналетнія. Гэтая тэма надзвычай цяпер актуальная», - сказаў Васіль Лосіч.

Са словаў прадстаўніка МУС, павысіць эфектыўнасць барацьбы з новымі пагрозамі дапаможа міжведамасная антынаркатычная камісія, якая будзе створана на базе трох ведамстваў: Дзяржаўнага камітэта судовых экспертыз, Міністэрства ўнутраных спраў і Міністэрства аховы здароўя. «Адна з задач гэтай камісіі - аператыўна ўводзіць наркотыкі, якія з'яўляюцца, у спіс забароненых, - адзначыў Васіль Лосіч. - У камісію ўвойдуць эксперты трох ведамстваў, а пастановы будуць прымацца на ўзроўні іх кіраўнікоў».