Берасцейскія мытнікі канфіскавалі ў масквіча рарытэтныя французскія газеты
9- 16.09.2014, 14:30
- 8,670
У пункце пропуску «Варшаўскі мост» былі выяўленыя рарытэтныя французскія газеты 1912-1913 гадоў выпуску.
Як паведамілі сайту charter97.org у прэс-службе Берасцейскай мытні, грамадзянін Расеі, 33-гадовы жыхар Масквы вяртаўся з замежнай паездкі на радзіму. Падчас дагляду аўтамабіля Land Rover сярод асабістых рэчаў кіроўцы былі выяўленыя восем не задэклараваных друкаваных выданняў на французскай мове Le Miroir (па-француску. «Люстэрка»). Кожны асобнік газеты ўтрымлівае ад 8 да 12 старонак. Згодна з тытульным лістом, газеты былі выдадзеныя ў Парыжы ў 1912-1913 гадах. Друкаваная перыёдыка добра захавалася.
Для высвятлення гістарычнай і культурнай каштоўнасці друкаваныя рарытэты накіраваныя на экспертызу. Згодна з дзейным заканадаўствам, друкаваная прадукцыя, вырабленая больш за 100 гадоў таму, з'яўляецца культурнай каштоўнасцю і падлягае пісьмоваму дэклараванню, растлумачылі ў мытні.