Затрыманых у Менску журналістаў вызвалілі

Траіх журналістаў, затрыманых днём 16 верасня каля Цэнтральнага суда Менску, прыкладна а 17.30 вызвалілі з Ленінскага РУУС сталіцы.

Як паведамлялася раней, відэааператар інфармацыйнай кампаніі БелаПАН Сяргей Сацюк, ягоны калега Аляксандр Баразенка і незалежная журналістка Наталля Валакіда былі затрыманыя прыкладна а 14:45 адразу пасля заканчэння візіту ў Беларусь прадстаўніка АБСЕ ў пытаннях свабоды СМІ Дуні Міятавіч. Журналісты планавалі асвятляць судовы працэс у дачыненні да грамадскага актывіста з Гомеля Юрыя Рубцова, які абвінавачваецца паводле артыкула 391 Крымінальнага кодэкса Беларусі (абраза суддзі або народнага лаўніка).

Пасля вызвалення Сацюк сказаў, што прыехаў у суд да 14:00, за гадзіну да пачатку працэсу. Ён адразу заўважыў, што тэрыторыю вакол суда Цэнтральнага раёна патрулююць супрацоўнікі АМАПу. Ва ўнутраным дворыку ўжо знаходзіўся Рубцоў, які чакаў пачатку судовага паседжання. Разам з Аляксандрам Баразенкам і Наталляй Валакіда было пастаноўлена ўзяць каментар у абвінавачанага грамадскага актывіста.

Неўзабаве пасля гэтага да журналістаў падышоў патрульны нарад - двое супрацоўнікаў АМАПу і трое міліцыянтаў у цывільным, якія «прадставіліся і паказалі свае дакументы». «Яны папрасілі нас паказаць акрэдытацыю. Я дастаў сваё пасведчанне, у Баразенкі з сабой быў толькі пашпарт», - сказаў Сацюк.

Міліцыянты «ветліва прапанавалі праехаць у РУУС для высвятлення асобаў». Разам з журналістамі праваахоўнікі затрымалі Ільлю Дабратвора, які прыйшоў на суд апазіцыйнага актывіста, на якім была футболка «Свабоду палітвязням».

«У Ленінскім РУУС нас завялі ў актавую залу, - сказаў Сацюк. – Дзесьці праз пятнаццаць хвілін пасля таго, як нас прывезлі, міліцыя павяла Дабратвора невядома куды, мы больш яго не бачылі».

Журналісты правялі ў гэтым памяшканні прыкладна тры гадзіны. За гэты час супрацоўнікі міліцыі перапісалі іх звесткі. Сацюк падкрэсліў, што тэхніку ніхто не правяраў і знятыя матэрыялы не перачытваў. Агулам стаўленне да журналістаў было карэктным.

Нагадаем, 15-16 верасня Менск з афіцыйным візітам наведала прадстаўніца Арганізацыі бяспекі і супрацоўніцтва ў Еўропе ў пытаннях свабоды СМІ Дуня Міятавіч. Яна сустрэлася з міністрам замежных спраў Уладзімірам Макеем і міністрам інфармацыі Ліліяй Ананіч, абмеркаваўшы з імі сітуацыю са свабодай СМІ ў Беларусі. Міятавіч таксама ўзяла ўдзел у семінары ўзаемадзеяння органаў правапарадку і СМІ ў Беларусі.

У інтэрв'ю 15 верасня Дуня Міятавіч з задавальненнем адзначыла той факт, што колькасць затрыманняў журналістаў у Беларусі стала змяншацца. «Бачна, што ўлады спрабуюць нешта зрабіць», - выказала здагадку прадстаўнік АБСЕ ў пытаннях свабоды СМІ.

«Пераслед, затрыманні, збіццё журналістаў - гэта абсалютна непрымальна», - падкрэсліла Дуня Міятавіч.