Сапраўдная восень прыйдзе на наступным тыдні

Сонечнае і сухое надвор'е захаваецца ў сталіцы да нядзелі.

Пра гэта карэспандэнту агенцтва «Мінск-Навіны» распавяла галоўны сіноптык Рэспубліканскага гідраметэацэнтра Святлана Рыбакова.

Гэтай ноччу ў Менску +4...+6°С, заўтра ўдзень +16...+18°С і без істотных ападкаў. Уночы і раніцай месцамі ў горадзе могуць згушчацца туманы. Такое ж надвор'е чакаецца ў чацвер і пятніцу.

У суботу таксама суха, але ўдзень на градус цяплей. У нядзелю ўначы +7...+ 9°С, удзень +17...+19 С, ёсць імавернасць невялікага кароткачасовага дажджу.

У пачатку наступнага тыдня з праходжаннем атмасфернага фронту надвор'е пачне мяняцца. Пройдуць кароткачасовыя дажджы. Тэмпературны фон панізіцца - да нас пачне паступаць халоднае паветра са Скандынаўскага паўвострава. У панядзелак уначы +6...+8°С, удзень +14...+16°С. У аўторак стане на пару градусаў халадней.