Кожны беларус вінны 4289 даляраў

Валавая замежная запазычанасць Беларусі дасягнула 55,5% ВУП.

Такія звесткі ўтрымліваюцца ў статыстычнай справаздачы Нацыянальнага банка, падрыхтаванага паводле метадалогіі МВФ, піша «Інтэрфакс».

Згодна з дакументам, валавая замежная запазычанасць Беларусі ва ўсіх сектарах эканомікі паводле стану на 1 ліпеня 2014 дасягнула $40,6091 млрд і вырасла за паўгоддзе на $988 млн або на 2,5%. У справаздачы адзначаецца, што паводле стану на 1 ліпеня валавая замежная запазычанасць склала 55,5% ВУП, што адпавядае паказчыку на пачатак года. Разам з тым, паводле вынікаў I квартала суадносіны валавой замежнай запазычанасці ($39,2691 млрд) да ВУП складалі 54,1%.

Паводле звестак НББ, на 1 ліпеня 2014 года на душу насельніцтва ў рэспубліцы прыходзілася $4288,6 валавой замежнай запазычанасці.

У першым паўгоддзі Беларусь накіравала на абслугоўванне валавой замежнай запазычанасці $5,4587 млрд, што складае 15,8% ВУП, або 24,8% экспарту тавараў і паслуг. У тым ліку плацяжы па асноўнай запазычанасці склалі $4,7404, плацяжы па адсотках - у суме $718,3 млн.

Замежная запазычанасць органаў дзяржаўнага кіравання на 1 ліпеня склала $13,9363 млрд і скарацілася за паўгоддзе на 6,9%. Запазычанасць дэпазітных арганізацый за студзень-чэрвень дасягнула $3,7684 млрд, павялічыўшыся за гэты перыяд на 53,7%. Абавязацельствы ў пазыках іншых сектараў эканомікі знізіліся за першае паўгоддзе на 5,7% і на 1 ліпеня склалі $4,5561 млрд.

На абслугоўванне замежнай запазычанасці органаў дзяржаўнага кіравання ў першым паўгоддзі гэтага года было накіравана $1,7666 млрд, з іх $1,5073 млрд пайшло на выплату асноўнай запазычанасці, $259,3 млн - на выплаты адсоткаў.

Валавая замежная запазычанасць Беларусі за 2013 вырасла на 15,9% і склала на 1 студзеня 2014 г $39,1243 млрд. На яе абслугоўванне ў 2013 годзе было накіравана $6,6229 млрд, што складае 9,3% ВУП, або 15,1% экспарту тавараў і паслуг. У тым ліку плацяжы па асноўнай запазычанасці склалі $5,3199 млрд, плацяжы па адсотках - у суме $1,3030 млрд.

Валавая замежная запазычанасць Беларусі ўяўляе сабой нявыплачаную суму фактычных бягучых і неабумоўленых абавязацельстваў, якая патрабуе выплаты асноўнай запазычанасці і/або адсоткаў дэбіторам у наступны перыяд часу і ўяўляе сабой абавязацельствы рэзідэнтаў Беларусі перад нерэзідэнтамі. Валавая замежная запазычанасць уключае ў сябе запазычанасць органаў дзяржаўнага кіравання, органаў грашова-крэдытнага рэгулявання, банкаў і іншых сектараў эканомікі.