АБСЭ заявіла аб парушэнні баевікамі рэжыму спынення агню

Тэрарысты адкрылі агонь па блокпосце сіл АТА ў Данецкай вобласці, на якім знаходзіліся прадстаўнікі місіі АБСЕ.

Спецыяльная маніторынгавая місія АБСЕ канстатавала шматлікія парушэнні рэжыму спынення агню ў Данбасе з боку тэрарыстаў. Асобна адзначаны абстрэл баевікамі ўкраінскага блокпосту ў раёне сяла Малаарлоўка Данецкай вобласці, на якім знаходзіліся чальцы назіральнай групы АБСЕ. Пра гэта на брыфінгу паведаміў спікер інфацэнтра РНБА Андрэй Лысенка, піша liga.net.

"Не выключана, што баевікі адкрылі агонь ва ўкраінскіх вайскоўцаў з мэтай правакацыі, паколькі пра паездку назіральнікаў АБСЕ ім было вядома загадзя", - адзначыў Лысенка.

З ягоных слоў, незаконныя ўзброеныя фармаванні (НУФ) і расейскія вайскоўцы працягваюць праводзіць абстрэлы пазіцый сіл антытэрарыстычнай аперацыі, нягледзячы на абвешчаны рэжым спынення агню.

"На працягу дня пад агонь патрапілі пазіцыі падраздзяленняў ВС Украіны ў Данецкай вобласці ў раёнах населеных пунктаў Ніжняя Крынка, Пескі, аэрапорта Данецк, Рэдкадуб, Гранітнае, Курахава, Новаарлоўка, Дэбальцава, Шумы. У Луганскай вобласці тэрарысты абстралялі пазіцыі ўкраінскіх вайскоўцаў у населеных пунктах Папасная, Станіца Луганская, Навасёлаўка, Цэнтральны, Міус, Чарнухін", - сказаў ён.

За мінулыя суткі страт сярод украінскіх вайскоўцаў няма, дадаў Лысенка.

Раней паведамлялася, што контрразведка Службы бяспекі Украіны 15 верасня затрымала грамадзяніна Украіны "К" - верхавода дыверсійнай групы ДНР.