Еўропа мабілізуецца для абароны ад газавага шантажу Масквы

Брусэль арганізуе стрэс-тэсты пасля не доўгачасовага спынення паставак газу з Расеі ў мінулы чацвер.

Аб гэтым піша выданне Le Temps (пераклад — Инопресса.ру).

Еўрапейскі звяз не хоча драматызаваць запаволенне паставак газу з Расеі 10 і 11 верасня гэтага года ў Польшчу, Вугоршчыну, Славакію і Румынію. Асабліва з набліжэннем зімы. "Сітуацыя нармалізавалася да раніцы панядзелка", - запэўніў брусэльскі дыпламат. Гэта закручванне гаек мела месца на наступны дзень пасля ўзмацнення жорсткасці санкцый у дачыненні да Масквы і ўспрымаецца як папярэджанне. На працягу двух дзён Варшава была не ў стане рабіць рэверсныя пастаўкі ва Украіну, якой "Газпром" не пастаўляе газ з чэрвеня гэтага года.

"Пагроза энэргетычнага крызісу, звязанага з украінскім канфліктам, павінна стаць прадметам абмеркавання падчас сустрэчы на ўзроўні міністраў ЕЗ у гэтую суботу. Афіцыйна ЕЗ ніяк не звязвае вяртанне да нармальнага ўзроўню паставак газу і сваю пастанову перанесці на год рэалізацыю пагаднення аб свабодным гандлі з Кіевам. Са слоў нейкага дыпламата, гэтая адтэрміноўка звязаная з тэхнічнымі пытаннямі, але не з газам", - пішуць аўтары артыкула.

Але нават калі Брусэль і не хоча бачыць у інцыдэнце меры ў адказ Масквы, ЕЗ мае намер паскорыць "стрэс-тэсты" ў мабілізацыі газавых сховішчаў і альтэрнатыўных крыніц забеспячэння энэргетычнай сыравінай краін-чальцоў ЕЗ. У будучым месяцы павінен быць гатовы даклад, у якім будзе ўлічаны варыянт спынення Масквой паставак газу ў Еўропу.

У канцы чэрвеня з'явіўся даклад Міжнароднага энэргетычнага агенцтва, у якім гаворыцца аб тым, што газаправод "Паўночны паток", пабудаваны па дне Балтыйскага мора ў абыход тэрыторыі Украіны, можа павялічыць пастаўкі газу на 2 млрд кубаметраў у месяц. Але гэта не будзе мець ніякага сэнсу, калі Масква наважыць перакрыць увесь экспарт, гаворыцца ў артыкуле.

Еўропе будзе складана знайсці іншых пастаўшчыкоў. Алжыр? У дакладзе гаворыцца, што пастаўкі газу скараціліся ў апошнія гады, што асноўная колькасць вуглевадароднай сыравіны застаецца ў Гішпаніі, сувязь якой з астатняй Еўропай абмежаваная. Не варта спадзявацца на пастаўкі газу з Лібіі, якая завязла ў хаосе. Занадта дарагімі могуць быць пастаўкі звадкаванага газу з Блізкага Усходу. Застаюцца такія далёкія пастаўшчыкі, як Іран. Але экспарт з Ірана, які праходзіць праз Турцыю, скарачаецца ўдвая ў сувязі з неабходнасцю задавальнення патрэб насельніцтва. Што тычыцца Азербайджана, то нават калі ён будзе нарошчваць пастаўкі на 2 млрд кубаметраў кожны месяц, такой колькасці не хопіць нават Швейцарыі, піша выданне.

"Не змогуць прыйсці на дапамогу і Нідэрланды: у студзені ўрад краіны прыняў пастанову скараціць здабычу на радовішчы Кронінген з тым, каб абмежаваць прасяданне глебы", - гаворыцца ў артыкуле.