Яраш нагадаў Парашэнку пра лёс Януковіча
47- 18.09.2014, 9:22
- 32,004
Лідэр «Правага сектара» абвінаваціў прэзідэнта Украіны ў здрадзе нацыянальных інтарэсаў.
Пра гэта Дзмітрый Яраш напісаў на сваёй старонцы ў сацыяльнай сетцы «Фэйсбук», каментуючы закон аб адмысловым статусе Данбаса.
«Калі Пётр Аляксеевіч Парашэнка не апамятаецца, у нас, ва Украіне, будзе новы прэзідэнт і галоўнакамандуючы. Калі хто ў гэта не верыць, то хай напіша ліст Януковічу. Той пацвердзіць, што не рэальнае - ажыццяўляецца», - напісаў лідэр «Правага сектара».
Дзмітрый Яраш сказаў, што галасаванне ў Радзе што да гэтага пытання «не мае ніякага значэння і юрыдычнай сілы».
Закон аб адмысловым статусе Данбаса раскрытыкавалі многія палітыкі Украіны. У прыватнасці, лідэр партыі «Бацькаўшчына» Юлія Цімашэнка заяўляла, што частку краіны здаюць пад пратэктарат Расеі.
Закон аб адмысловым статусе прадугледжвае правядзенне на паўднёвым усходзе Украіны 7 снежня выбараў у мясцовыя рады. Ён таксама прадугледжвае асаблівы парадак прызначэння кіраўнікоў органаў пракуратуры і судоў. Дакумент быў перададзены ў Вярхоўную Раду прэзідэнтам Украіны.