У Менску даішнікі са стральбой затрымалі п'янага кіроўцу

Супрацоўнікі ДАІ Ленінскага раёна горада Менска ўчора ноччу на МКАД у раёне з'езду на Новы Двор затрымалі п'янага кіроўцу Renault.

Пра гэта карэспандэнту БелТА паведаміла старшая інспектарка агітацыі і прапаганды АДАІ РУУС Ленінскага раёна Таццяна Красій.

«Трое жыхароў Мар'інай Горкі выпілі і наважылі ноччу з'ездзіць у Менск. Няўпэўненая манера язды кіроўцы адразу звярнула ўвагу супрацоўнікаў ДАІ, якія дзяжурылі ў гэтым раёне. На дарозе кіроўца паводзіў сябе неадэкватна - перабудоўваўся з аднаго шэрагу ў іншы і назад, то павялічваў хуткасць, то рэзка тармазіў. Быў пададзены сігнал аб спыненні, але кіроўца павялічыў хуткасць, маючы намер схавацца ад інспектараў. Інспектары пастанавілі страляць. Яны зрабілі пяць папераджальных стрэлаў, а шостым прыцэльным прабілі задняе кола аўтамабіля. Машына спынілася ў першым шэрагу, ніякіх іншых пашкоджанняў на ёй не выявілі», - распавяла Таццяна Красій.

Як толькі аўтамабіль быў затрыманы, кіроўца і двое пасажыраў кінуліся з аўтамабіля ўрассыпную. Супрацоўнікам Дзяржаўтаінспекцыі атрымалася затрымаць дваіх маладых людзей - кіроўцу 1994 года нараджэння і ўладальніка Renault 1991 года нараджэння. Медыцынскі агляд паказаў, што абодва былі п'яныя - 1,8 праміле ў кіроўцы, 1,24 праміле ва ўладальніка машыны.

Абодва парушальнікі будуць прыцягнутыя да адміністрацыйнай адказнасці.