Гандаль з тэрарыстамі: украінская версія

Таямнічы брокер укладае ўгоды дзеля вызвалення палонных вайны.

У Данецку ў пачатку верасня Уладзімір Рубан апынуўся перад выбарам: прарасейскія паўстанцы былі гатовыя вызваліць толькі 8 з 40 ваеннапалонных, піша журналіст Алек Лун у артыкуле, апублікаваным у Foreign Policy (пераклад - Инопресса.ру). "Меркавалася, што я пакажу пальцам і абяру, хто застанецца і, магчыма, загіне, а хто вернецца дадому да сем'яў", - сказаў у інтэрв'ю Рубан. Журналіст піша пра яго так: "Загадкавы былы генерал-лейтэнант [украінская і расейская прэса называе Рубана "генерал-палкоўнікам"], верагодна, украінскай службы бяспекі, хоць ён адмовіўся казаць пра гэта".

Паводле звестак аўтара, за апошнія чатыры месяцы Рубан дамовіўся аб вызваленні не менш за 200 вайскоўцаў урадавых сіл. "Ён ездзіў далёка ўглыб тэрыторыі, падкантрольнай паўстанцам, і дамагаўся саступак нават ад самых грозных іх камандзіраў", - гаворыцца ў артыкуле.

Лун вяртаецца да гісторыі з выбарам: тады афіцэры наважылі, што дахаты вернуцца 8 чалавек, у якіх больш за ўсё дзяцей, а паўстанцы ў дадатак вызвалілі яшчэ дваіх: "аднаго - бо яму было ўсяго 19 гадоў, а за іншага ўступілася ўкраінская спявачка Руслана, якая прыехала з Рубанам".

Вызваленне палонных - наступны (пасля спынення агню) этап супакаення на Усходняй Украіне, тлумачыць аўтар.

Рубан - "мабыць, адзін з самых эфектыўных міратворцаў у канфлікце, дзе чыноўнікі ўрада ўсё яшчэ адмаўляюцца сустракацца напрамую з тэрарыстамі з непрызнаных рэспублік усходу. Ён сцвярджае, што салдаты, ваюючыя паміж сабой на месцах, стаміліся ад баёў і здольныя прыйсці да пагаднення , калі гэта неабходна: Рубан распавёў мне пра інцыдэнт, калі паўстанцы дамовіліся адкласці свой артабстрэл на паўгадзіны, каб група ўкраінскіх салдат паблізу Данецка магла дагатаваць аўсянку", піша аўтар. Рубан узначальвае ветэранскую арганізацыю "Афіцэрскі корпус", гаворыцца ў артыкуле. Яна не афіляваная афіцыйна ні з урадам, ні з вайскоўцамі, але, па чутках, Рубан у добрых дачыненнях з чыноўнікамі ў Кіеве і Днепрапятроўску.

"Наша місія - пакласці канец гэтай братазабойчай вайне", - сказаў Рубан у інтэрв'ю Луну.

Рубан не выкупляе палонных за грошы - звычайна яны абменьваюцца на захопленых тэрарыстаў, сцвярджае выданне. Са слоў Рубана, аснова дамоўленасцей - узаемная павага і давер, а таксама яго "слова афіцэра".

"Барыс Літвінаў, старшыня Вярхоўнага савета ДНР, сказаў, што досвед Рубана (у больш ранніх інтэрв'ю перамоўшчык казаў, што ў яго ёсць сувязі ў расейскай выведцы) і той факт, што ён не з'яўляецца дзеючым генералам, дазваляюць яму паспяхова дамаўляцца аб вызваленні людзей", - паведамляе карэспандэнт.

"Праваабарончыя арганізацыі вінавацяць абодва бакі канфлікту ў выкраданні і катаваннях грамадзянскіх асоб і дзяржслужачых. Рубан сказаў, што многія ваеннапалонныя таксама ўтрымліваюцца ў дрэнных умовах і падвяргаюцца катаванням", - гаворыцца ў артыкуле.

Але, са слоў Рубана, умовы ўтрымання паволі паляпшаюцца. У пачатку верасня Рубан абвясціў, што «кіраўнік ДНР» Захарчанка пагадзіўся скасаваць умовы вяртання целаў загінулых, а таксама абяцаў не катаваць палонных. "Я абяцаю, што мы будзем абыходзіцца з палоннымі як належыць, а яны абяцаюць тое ж самае ў сябе", - сказаў Рубан.