Міністр культуры РФ прагназуе крах турбізнэсу

Крызіс у расейскай турыстычнай галіны працягнецца, а банкруцтвы тураператараў, якія адбыліся, не стануць апошнімі.

З такім несуцяшальным прагнозам выступіў у панядзелак, 22 верасня, на слуханнях у Грамадскай палаце ў Маскве міністр культуры РФ Уладзімір Мядзінскі. Ён дадаў, што ў 2015 годзе міністэрства прагназуе рост уязнога турпатоку ў Расею на 15%. На гэтым фоне, са слоў чыноўніка, у краіне плануецца стварыць нацыянальную сістэму браніравання гатэляў паводле аналогіі з сайтамі Booking.com і Tripadvisor, паведамляе РІА "Новости".

Кажучы аб банкруцтвах тураператараў, Мядзінскі адзначыў, што "16 банкруцтваў (тураператараў), якія адбыліся (з сярэдзіны лета), не апошнія". "Таму людзі, якія карыстаюцца паслугамі танных тураператараў, экстраннымі турамі, - гуляюць у рускую рулетку. Вы'язджаюць без страхоўкі, без зваротнага квітка, нягледзячы на ўсе папярэджанні, інфармацыю, як сябе засцерагчы", - сказаў Мядзінскі.

Ён нагадаў, што тыдзень таму ва ўрад быў унесены праект пастановы, які прадугледжвае ўнясенне змяненняў у правілы продажу турпрадукту. У прыватнасці, ён абавязвае ўсе турыстычныя кампаніі выдаваць турыстам зваротныя авіябілеты не менш чым за 24 гадзіны да паездкі. Гэта павінна дазволіць выкараніць практыку выдачы квіткоў у адзін канец, праз шырокае распаўсюджванне якой многія кліенты збанкрутавалых у гэтым годзе тураператараў не мелі зваротных квіткоў, і таму іх прыйшлося эвакуіраваць па лініі "Турдапамогі".

У панядзелак гэтую пастанову ўжо падпісаў прэм'ер-міністр РФ Дзмітрый Мядзведзеў, аб чым ён паведаміў сам на сустрэчы з віцэ-прэм'ерамі. "Падпісаў пастанову, якая будзе спрыяць павышэнню прававой абароненасці турыстаў... Цяпер тураператары абавязаны за суткі да падарожжа перадаваць сваім кліентам на рукі ўсе неабходныя дакументы, у тым ліку, квіткі туды і назад, нават у тых выпадках, калі гаворка ідзе пра чартар", - сказаў прэм'ер. "Калі білет афармляецца ў электронным выглядзе, выдаецца выпіска з аўтаматызаванай сістэмы, якая змяшчае звесткі аб перавозках", - дадаў кіраўнік Кабінета міністраў.

Таксама, са слоў Мядзінскага, плануецца надзяліць Растурызму функцыяй кантролю за тураператарамі, пасля праверак магчымае выключэнне тураператараў з рэестра, што азначае прыпынак іх дзейнасці. З ягоных слоў, мяркуецца выбарачная праверка сумесна з Расспажыўнаглядам турагенцтваў - падатковая праверка, праверка пацверджання гатэляў, білетаў.