Лукашэнка: Даставайце грошы і дабудоўвайце гэтыя комплексы

Дыктатар патрабуе тэрмінова аднавіць аб'ёмы вытворчасці свініны ў краіне.

На гэтым ён акцэнтаваў увагу сёння на нарадзе аб мерах, якія прымаюцца ва аднаўленні аб'ёму вытворчасці свініны ў існуючых ветэрынарных умовах, паведамляе карэспандэнт БелТА.

Лукашэнка перакананы, што для выканання гэтай задачы ёсць усе ўмовы. Ва ўсіх рэгіёнах Беларусі пабудаваны і функцыянуюць магутныя свінагадоўчыя комплексы, прадукцыя якіх не толькі паступае на ўнутраны рынак, але і экспартуецца. Ёсць прапановы навукоўцаў, як аднавіць аб'ём вытворчасці свініны ва ўмовах ветэрынарнага не спрыяння.

"Аднаўленне аб'ёмаў вытворчасці свініны - у ліку пытанняў эканамічнай і харчовай бяспекі краіны", - заявіў ён. Перад урадам і мясцовымі органамі ўлады пастаўлена задача зрабіць гэта да 1 красавіка 2015 года. "Усе ўзялі пад казырок і нібыта распрацавалі адпаведныя планы", - адзначыў Лукашэнка. Ён папярэдзіў, што не павінна быць паўтарэння памылак, якія былі дапушчаныя ў льнаводчай галіне, калі "бралі пад казырок і рабілі на 10-30%, а часам наогул нічога не рабілі". "Калі мы ў кантрольным плане прыходзілі да гэтага пытання, то нам і абмяркоўваць не было чаго", - нагадаў ён.

Лукашэнка падкрэсліў, што неабходна цалкам укамплектаваць комплексы, пабудаваныя ў 2013-2014 гадах. З ягоных слоў, недаўкамплектаванасць гэтых комплексаў проста злачынная. Ёсць і праблема тэрытарыяльнай раз'яднанасці, калі ў адной гаспадарцы няма памяшканняў для адкорму парсючкоў, а дзесьці комплексы пустуюць. Правадыр акцэнтаваў увагу на неабходнасці павысіць эфектыўнасць дзеючых комплексаў за кошт строгага выканання тэхналогій вырошчвання, каб атрымліваць добрыя прыбаўленні.

Лукашэнка запатрабаваў паскорыць завяршэнне будаўніцтва новых комплексаў. "Не чакайце, што нехта прыйдзе і вам пабудуе. Даставайце з усіх кішэняў грошы і дабудоўвайце гэтыя комплексы", - сказаў ён.

Месцы для адкорму, якія адсутнічаюць, можна атрымаць за кошт будаўніцтва хуткаўзведзеных каркасна-тэнтавых ангараў. Прычым развязваць гэтую задачу трэба цяпер, пакуль не наступіла зіма. "Таму неадкладна, калі вы прынялі пастанову, пачынайце аднаўляць, прытым за капейкі, ніхто вам вялікіх грошай на гэта не дасць, падобныя свінагадоўчыя комплексы або фермы", - сказаў ён. Ён адзначыў, што навукоўцы прапрацавалі варыянты паскоранага ўзнаўлення племянных свіней. Гэтая тэма таксама сёння абмяркоўваецца на нарадзе.

"Што тычыцца эпізаатычнай сітуацыі ў свінагадоўлі, то прайшло крыху больш за год з дня правядзення нарады, на якой мы яе разглядалі і выпрацоўвалі меры ў барацьбе з вірусным захворваннем свіней, - нагадаў ён. - Тады вызначыліся, што і як трэба рабіць. У прыватнасці, ліквідаваць ачагі гэтай заразы і крыніцы захворвання ў дзікай прыродзе. Прычым, зачышчаючы асяроддзе, трэба па-чалавечы ставіцца да людзей, чые інтарэсы гэта закране". Павінны быць таксама беражлівыя адносіны да прыроды і жывёл. Дыктатар перасцярог ад бяздумнага стаўлення ў гэтым пытанні: "У нас так: пайшлі фронтам, дзе не атрымліваецца адстрэліць дзіка - спалім лес, высечам яго".

Паколькі гэтая праблема тычыцца не толькі Беларусі, а многіх іншых краін, яе трэба развязваць комплексна.