Беларусы больш за гадзіну не маглі расплаціцца пластыкам

У нядзелю ў краіне здарыўся чарговы картачны калапс.

З 10.59 да 12.13 практычна ні ў адной краме не працавалі тэрміналы, ды і зняць гатоўку ў банкамаце таксама не атрымлівалася. У мінулы раз падобны збой адбыўся ў чэрвені гэтага года, піша «Комсомольская правда в Беларуси».

- Што мы можам зрабіць, няма сувязі з банкам, - адказвалі засмучаным пакупнікам прадаўцы.

З гэтым сутыкнуліся не толькі менчукі: карткі не працавалі як мінімум у Магілёве, Віцебску, Пінску, Драгічыне. Прычына - збой у працы Банкаўскага працэсінгавага цэнтра. Гэта пасярэднік паміж банкамі, у якім апрацоўваецца інфармацыя пры розных аперацыях.

- У Банкаўскім працэсінгавым цэнтры абслугоўваюцца буйныя дзяржаўныя і недзяржаўныя банкі - напрыклад, Беларусбанк, БПС-Ашчадбанк, Белаграпрамбанк. Таму калі там адбываецца нейкі збой, то ён закранае значную частку ўсіх выпушчаных картак і інфраструктуры (тэрміналы, банкаматы), - тлумачыць спецыяліст у аперацыях з карткамі аднаго з камерцыйных банкаў. - Акрамя таго, БПЦ з'яўляецца яшчэ і працэсінгавым цэнтрам нацыянальнай плацежнай сістэмы «Белкарт». Усе запыты, якія здзяйсняюцца то да беларускага пластыку, праходзяць праз яго. Таму збой менавіта ў БПЦ заўсёды найбольш крытычны для сістэмы агулам. Можна сказаць, што праз яго праходзіць каля 90% усіх картачных аперацый у Беларусі. У іншых краінах сістэма ў асноўным дэцэнтралізаваная, таму, калі ў адным з працэсінгавых цэнтраў адбываецца нейкі збой, гэта не так прыкметна, як у нас.

- У некаторых беларускіх банках (напрыклад, у Прыёрбанку або банку БелВЭБ) ёсць свае працэсінгавыя цэнтры, у якіх абслугоўваюцца ў тым ліку іншыя банкі. Атрымліваецца, іх гэты збой ніяк не крануў?

- Дапусцім, падчас збою я паспрабаваў расплаціцца карткай Maestro, выпушчанай банкам Масква-Менск (ён карыстаецца паслугамі іншага працэсінгавага цэнтра), у краме, дзе ўсталяванае абсталяванне Прыёрбанка. Мая аперацыя прайшла б, бо банкаўскі працэсінгавы цэнтр у гэтай працэдуры ніяк не задзейнічаны. Але калі б у мяне была картка сістэмы «Белкарт» або тэрмінал у краме вызначыў бы, да прыкладу, Беларусбанк, то расплаціцца б я ўжо не змог.