Берасцейскія памежнікі канфіскавалі амаль 30 кг гашышу
3- 25.09.2014, 11:16
- 6,655
Берасцейскія памежнікі затрымалі буйную партыю гашышу, якую перавозіў расеец.
Пра гэта паведамілі charter97.org у прэс-службе Берасцейскай Чырванасцяжнай памежнай групы ім. Ф.Э.Дзяржынскага.
Партыя канфіскаваная 24 верасня ў міжнародным аўтадарожным пункце пропуску «Берасце». Наркотык быў у мікрааўтобусе Ford Transit пад кіраваннем 46-гадовага грамадзяніна Расейскай Федэрацыі, які ішоў на ўезд у Беларусь.
Расеец, вяртаючыся з замежнай паездкі, для перасячэння дзяржаўнай мяжы ў пункце пропуску абраў «зялёны» калідор. Падчас праходжання працэдуры афармлення мікрааўтобус трапіў пад падазрэнне памежнага нарада дагляду транспартных сродкаў. Пасля перасячэння лініі, якая пазначае выезд з «зялёнага» калідора, транспартны сродак быў накіравана ў бокс для правядзення спецыяльнага дагляду.
Падчас праверкі памежнікі сумесна з супрацоўнікамі Берасцейскай мытні пад ашалёўкай салона мікрааўтобуса выявілі 37 скруткаў, пераматаных скотчам. Унутры скруткаў знаходзілася рэчыва цёмна-карычневага колеру расліннага паходжання, як мяркуецца гашыш. Агульная маса нелегальнага грузу склала амаль 30 кг.
Рэчыва канфіскаванае супрацоўнікамі Берасцейскай памежнай групы і перададзенае ў экспертна-крыміналістычны цэнтр УУС Берасцейскага аблвыканкама. Кіроўца і аўтамабіль затрыманыя для далейшага разгляду.