У Віцебску адкрываецца фестываль аўтарскай песні
3- 29.09.2014, 9:35
- 3,704
Фестываль збярэ ў Віцебску выканаўцаў з Беларусі, Расеі і Латвіі.
Аўтары-выканаўцы і калектывы з розных краін возьмуць удзел у канцэртах ХХVIII Гарадскога фестывалю-свята аўтарскай песні «Віцебскі лістапад», які пройдзе ў абласным цэнтры з 17 да 19 кастрычніка, паведамілі карэспандэнту БелТА ў Цэнтры культуры «Віцебск».
«У які раз аматары гітары і аўтарскай песні збяруцца ў Віцебску, каб напоўніць яго цёплымі ўспамінамі і жывой музыкай, якая зможа запаліць глядацкія сэрца. Аўтары і выканаўцы, дуэты і ансамблі цягам трох дзён будуць выступаць у канцэртнай зале «Віцебск» і на пляцоўцы цэнтра культуры», - адзначылі арганізатары.
Праграма фестывалю ўключае правядзенне конкурсу аўтарскай песні ў наступных намінацыях: аўтар, выканаўца, дуэт, ансамбль. Прыём заявак на ўдзел у конкурсе вядзецца да 11 кастрычніка ўключна ў Цэнтры культуры «Віцебск».
Творчае спаборніцтва выканаўцаў адбудзецца 18 кастрычніка. Журы вызначыць лаўрэатаў конкурсу I, II і III ступені. Узнагароджанне пераможцаў і канцэрт з удзелам лаўрэатаў пройдзе 19 кастрычніка.