Серэна Уільямс перамагла ў US Open
11- 8.09.2014, 9:25
- 6,594
Амерыканка Серэна Уільямс стала пераможцай Адкрытага чэмпіянату ЗША ў тэнісе.
Пра гэта паведамляе афіцыйны сайт US Open. У фінальным матчы турніру, які адбыўся ў Нью-Ёрку ў панядзелак, 8 верасня, яна падолела датчанку Караліну Вазняцкі, піша Lenta.ru.
Для перамогі першай ракетцы свету хапіла двух сэтаў. Матч доўжыўся 1 гадзіну 15 хвілін і завяршыўся з лікам 6:3, 6:3. Падчас цырымоніі ўзнагароджання на корт выйшлі тэнісісткі Марціна Наврацілава і Крыс Эвэрт, яны падарылі Серэне Уільямс залаты бранзалет ад Tiffani з выгравіраваным лікам «18», паведамляе Agence France-Presse.
«Гэта быў неверагодны момант для мяне. Турніры, у якіх я брала ўдзел летам, дапамаглі мне здабыць упэўненасць у сваіх сілах», - падзялілася спартоўка. Вазняцкі, нягледзячы на паразу, знаходзілася ў добрым настроі. «Уільямс, бясспрэчна, сёння была лепшай», - заявіла яна.
Агульны прызавы фонд турніру складае 38 мільёнаў даляраў.
Уільямс стала пераможцай US Open у трэці раз запар і ў шосты ў кар'еры - да гэтага яна перамагала ў Адкрытым чэмпіянаце ЗША ў 1999, 2002, 2008, 2012 і 2013 гадах. Усяго на рахунку 32-гадовай спартсменкі 18 перамог у турнірах серыі «Вялікага шлема» ў адзіночным разрадзе. Такім чынам, яна паўтарыла дасягненне Марціны Наврацілавай. Цяпер па ліку выйграных турніраў гэтай серыі Уільямс адстае толькі ад немкі Штэфі Граф (22 перамогі) і аўстралійкі Маргарэт Корт (24 перамогі).
Нагадаем, беларуска Вікторыя Азаранка ў чвэрцьфінальным матчы турніру прайграла расейцы Кацярыне Макаравай з лікам 6:4, 6:2.