Украінскія СМІ: Парашэнка таемна сустрэўся ў Кіеве з Сурковым

Дарадца Пуціна прыязджаў ва Украіну.

У нядзелю, 7 верасня, украінскае інфармацыйнае агенцтва УНН са спасылкай на неназваную крыніцу паведаміла, што ў Кіеве адбылася сустрэча паміж Пятром Парашэнкам і Уладзіславам Сурковым.

Паводле звестак агенцтва, аб сустрэчы ведае абмежаванае кола асоб. Аб магчымых тэмах гутаркі палітыкаў таксама не паведамляецца. У адміністрацыі прэзідэнта Украіны не змаглі ні пацвердзіць, ні зняпраўдзіць гэтую інфармацыю.

Раней неаднаразова паведамлялася аб тым, што Суркоў з'яўляецца «спецпрадстаўніком» Пуціна на Украіне. Акрамя таго, яго ўважаюць кіраўніком выбарчай кампаніі Віктара Януковіча ў 2004 годзе.

У сваю чаргу, заходнія эксперты не раз называлі Суркова «ценявым рэжысёрам» захопу Крыма. Менавіта гэтым тлумачыцца занясенне яго ў санкцыйныя спісы, уведзеныя Захадам.

Уладзіслаў Суркоў да снежня 2011 года займаў пасаду першага намесніка кіраўніка адміністрацыі прэзідэнта РФ, курыраваў пытанні ўнутранай палітыкі. З снежня 2011 года да траўня 2013 - віцэ-прэм'ер урада РФ. Быў адпраўлены ў адстаўку 8 траўня 2013 года з фармулёўкай «на ўласнае жаданне». Як патлумачыў тады прэс-сакратар прэзідэнта Дзмітрый Пяскоў, «гэта звязана з тэмай выканання прэзідэнцкіх указаў». У верасні 2013 года быў прызначаны памочнікам прэзідэнта, адказвае за ўзаемаадносіны з Абхазіяй і Паўднёвай Асеціяй. Паводле неафіцыйнай інфармацыі, Суркоў таксама з'яўляўся «ценявым дарадцам» Пуціна што да Украіны.