Краіны NATO распрацавалі план на выпадак нападу Расеі

У краінах NATO ёсць план дзеянняў на выпадак, калі Расея пастановіць на іх напасці.

Пра гэта заявіў прэзідэнт Румыніі Траян Бэсэску, піша Mediafax.ro.

«У Румыніі ёсць план дзеянняў на выпадак неабходнасці», - заявіў Бэсэску, дадаўшы, што ў гэтым заключаецца асноўная розніца сітуацыі да і пасля саміту ў Ньюпорт. Ён адзначыў, што ў Турцыі, Польшчы і краінах Балтыі быў такі план і да саміту NATO.

«Румынія і Балгарыя не мелі такога плану, паколькі ўважалі, што яны па-за зонай рызыкі. Змены пасля гэтага саміту заключаюцца ў тым, што ў Румыніі ёсць план на выпадак непрадбачаных абставінаў», - сказаў Траян Бэсэску.

Кіраўнік дзяржавы адзначыў, што план прадугледжвае сцэнары атакі з паветра, зямлі або мора.

«99,9%, што гэтага не адбудзецца, - запэўніў ён. - Але ёсць 0,01% шанцу, і як кіраўнік дзяржавы я не маю права не прыняць да ўвагі гэты крызіс бяспекі ў рэгіёне».

Бэсэску ўдакладніў, што адным з аргументаў для таго, каб мець план на выпадак непрадбачаных абставінаў - ланцуг замарожаных канфліктаў вакол Чорнага мора - Абхазія, Прыднястроўе, Нагорны Карабах, Крым.

«Усе гэтыя канфлікты знаходзяцца пад кантролем Расеі і могуць быць актываваныя па адным або ўсё адразу, што магло б выклікаць дэстабілізацыю з вельмі негатыўнымі наступствамі для Румыніі», - сказаў Бэсэску.

Ён таксама нагадаў, што расейскія баявыя караблі ў Севастопалі, якія былі захопленыя Расеяй у сакавіку, знаходзяцца ўсяго ў 160 марскіх мілях ад румынскага берага і могуць дасягнуць яго за шэсць гадзін.

Бэсэску таксама нагадаў, што лідэры сепаратыстаў задэкларавалі мэту дабрацца да румынскай мяжы.