Джордж Марцін напісаў кнігу ў суаўтарстве з чытачом

Наступная частка кнігі "Свет лёду і полымя" выйдзе ў кастрычніку.

Яна была напісаная ў суаўтарстве з Эліё Гарсія і Ліндай Антансон, піша БелТА.

Эліа Гарсія - фанат, які ў даслоўным сэнсе ведае больш аб свеце Джорджа Марціна, чым хто-небудзь іншы, уключна з самім пісьменнікам. Ён падтрымлівае базу звестак кожнага персанажа, месцазнаходжання і падзеі ў серыі за апошнія 17 гадоў. "Марцін кліча мяне, калі ў яго ёсць ідэя, і ён хоча пераканацца, што не выкарыстаў гэтага персанажа ці не згадваў пра гэта падрабязна раней, таму што ён не хоча супярэчыць сам сабе і трапіць ва ўласную пастку", - кажа Эліё. Прадусары з HBO таксама нярэдка звяртаюцца да паслуг фаната-архіварыюса.

Аўтары кнігі запэўніваюць, што на старонках новага твора адкажуць на пытанні чытачоў аб Сусвеце і дапамогуць лепш зразумець стасункі паміж галоўнымі героямі. "Свет лёду і полымя" - гэта "багата ілюстраваная ўсебаковая гісторыя Вэстэроса - ад росквіту да падзення". Крытыкі адзначаюць, што кніга "Свет лёду і полымя" нагадвае ім іншы твор - "Сільмарыліён", які быў выдадзена пасмяротна сынам Дж. Р. Р. Толкіна.

Дату выхаду яшчэ адной кнігі Джорджа Марціна "Ветра зімы" (The Winds of Winter), якая павінна стаць працягам серыі "Песня лёду і полымя", пакуль не называюць. Мяркуюць, што яна з'явіцца на кніжных прылаўках у 2015 годзе.

Першая кніга з цыкла раманаў "Песня лёду і полымя" выйшла ў 1996 годзе. Усенародная любоў і сусветная вядомасць прыйшла да Джорджа Марціна пасля таго, як паводле матываў яго кніг быў зняты серыял "Гульня пасадаў". Прэм'ера першага сезона серыяла ў ЗША адбылася 17 красавіка 2011 года. На сёння паказаныя чатыры сезоны кінасагі. Серыял неаднаразова намінаваўся на розныя прэміі. З актораў серыяла больш за ўсё ўзнагарод атрымаў Пітэр Дзінклейдж, які выканаў ролю Тырыёна Ланістэра. Ён быў уганараваны прэмій "Эмі" і "Залатым глобусам", абодва разы - у намінацыі "Найлепшая мужчынская роля другога плана".

Прэм'ера новых серый пятага сезону прызначаная на красавік 2015 года. Цяпер здымкі серыяла праходзяць у Еўропе.

Надоечы з'явілася інфармацыя, што ў новым сезоне "Гульні пасадаў" будуць адсутнічаць два ключавыя персанажы: Бран Старк і ягоны негаваркі слуга Хадор. "У нас будзе адзін сезон адпачынку, прапусцім год, але я мяркую, што нашая сюжэтная лінія прадоўжыцца да канца астатняй кнігі", - паведаміў актор Крысціян Нэйрн, які выконвае ролю Хадора. Таксама ён дадаў, што падчас адпачынку ён працягне падарожнічаць па свеце і выступаць у якасці дыджэя. У фінальным эпізодзе чацвёртага сезону Бран і Хадор нарэшце скончылі сваё доўгае падарожжа і сустрэлі трохвокага варона.