Суд паводле справы аб забойствах у Гюмры пройдзе ў Арменіі
8- 20.01.2015, 14:08
- 10,917
Публічны судовы працэс у справе аб забойствах у Гюмры пройдзе ў Арменіі.
Пра гэта заявіў у Ерэване старшыня Следчага камітэта Расеі Аляксандр Бастрыкін на сустрэчы з прэзідэнтам Арменіі Сержам Саргсянам у Ерэване, паведамляе РІА «Новости».
«Правядзенне ў Рэспубліцы Арменія публічнага судовага працэсу стане сведчаннем імкнення абодвух бакоў да справядлівасці і правасуддзя», - заявіў Бастрыкін.
Кіраўнік СКР адзначыў, што дасягнутае поўнае паразуменне з Ерэванам і ёсць дакладнае ўяўленне, якой будзе дапамога расейскіх сілавых структур у расследаванні, якое праводзіцца праваахоўнымі органамі Арменіі.
Са слоў Бастрыкіна, дзеянні расейскага следства як у Арменіі, так і ў Расеі будуць нацэленыя на ўсебаковае расследаванне абставінаў справы і праверку ўсіх наяўных версій, на выяўленне вінаватых і гарантыі непазбежнасці пакарання.
Падазраваным у здзяйсненні злачынства з'яўляецца расейскі жаўнер тэрміновай службы Валерый Пермякоў. Ён быў затрыманы пры спробе перасекчы мяжу з Турцыяй і ўжо прызнаў сваю віну. Паводле некаторых звестак, ён нібыта хацеў дэзертыраваць з расейскай вайсковай базы, зайшоў у дом, які трапіў па шляху, каб папіць вады, а потым застрэліў гаспадароў, баючыся, што яны яго выдадуць.
Забойства было ўчыненае раніцай 12 студзеня побач з расейскай вайсковай базай у Гюмры. Забітыя былі чальцамі адной сям'і: муж з жонкай, іх дачка, сын, нявестка і малалетні ўнук. Паводле звестак Следчага камітэта Арменіі, забітых расстралялі з аўтамата АК-74. Адзіны выжыўшы - паўгадовае дзіця - памёр 19 студзеня ад атрыманых раненняў.