Падаткавікі: Новая інструкцыя аб даходах-выдатках тычыцца толькі «дармаедаў»

Міністэрства падаткаў і збораў дало тлумачэнне з нагоды новай Інструкцыі, на падставе якой будуць праводзіць аналіз даходаў і выдаткаў грамадзян.

Нагадаем, дакумент 13 кастрычніка быў апублікаваны на Нацыянальным прававым партале і ўжо ўвайшоў у дзеянне. У тэксце Інструкцыі не прапісаны дакладны пералік грамадзян, якіх закране гэты дакумент. Сёння Міністэрства падаткаў і збораў патлумачыла, што навіна ўсё ж не закране ўсіх беларусаў, піша tut.by.

«Улічваючы, што Інструкцыя прынятая ў мэтах рэалізацыі Дэкрэта, то яе дзеянне распаўсюджваецца на правядзенне кантролю за адпаведнасцю расходаў і даходаў грамадзян, якія не ўдзельнічаюць у фінансаванні дзяржаўных расходаў або якія ўдзельнічаюць у такім фінансаванні менш за 183 каляндарныя дні ў каляндарным годзе», - гаворыцца ў прэс- рэлізе міністэрства.

Такім чынам, новы дакумент тычыцца толькі так званых гультаёў. А вось кантроль над даходамі-выдаткамі працоўных грамадзян па-ранейшаму будзе праводзіцца на падставе дэкларацый аб даходах і маёмасці.

Разлік выдаткаў і даходаў грамадзян, якія доўгі час не працавалі, падатковыя органы будуць складаць толькі за перыяд з 1 студзеня 2015 года. Калі будзе ўстаноўлена, што выдаткі перавысяць даходы, то грамадзянін атрымае пісьмовае патрабаванне аб дачы тлумачэнняў аб крынiцах прыбыткаў. Даць іх трэба будзе ў пісьмовай форме цягам 30 каляндарных дзён. Грамадзянін павінен распісаць крыніцы даходу, суму і дату атрымання, а таксама, з жадання, іншыя звесткі пра крыніцы прыбытку.

«Пры гэтым грамадзянін мае права паведаміць звесткі пра крыніцы яго даходаў за ўсякі перыяд, у якім ім атрыманыя такія даходы», - удакладняюць у МПЗ. Фактычна, непрацоўны сёння грамадзянін можа паказаць, што жыве за грошы, якія назапасіў да 1 студзеня 2015 года.

«Падаткаабкладанне даходаў, вылічаных зыходзячы з сум перавышэння выдаткаў над даходамі, будзе праводзіцца толькі ў выпадку, калі грамадзянін не падасць тлумачэнні аб крыніцах даходаў на пісьмовае патрабаванне падатковага органа або калі пададзеныя фізічнай асобай тлумачэнні не дазволяць устанавіць крыніца даходаў», - гаворыцца ў прэс- рэлізе МПЗ.