Лідары апазіцыі: Расея ўцягвае Беларусь у ваеннае супрацьстаянне з Еўропай

Размяшчэнне расейскіх вайсковых аб'ектаў у Беларусі супярэчыць Канстытуцыі і пагражае незалежнасці краіны.

Пра гэта заявілі старшыня Аб'яднанай грамадзянскай партыі Анатоль Лябедзька, лідар створанага руху «За дзяржаўнасць і незалежнасць Беларусі» Уладзімір Някляеў, экс-палітвязень Мікалай Статкевіч і лідэр грамадзянскай кампаніі "Еўрапейская Беларусь" Андрэй Саннікаў. Палітыкі выступілі з супольнай заявай, у якой заклікалі грамадзян не дапусціць размяшчэння на тэрыторыі Беларусі расейскай вайсковай базы, піша БелаПАН.

Аўтары дакумента нагадваюць, што кіраўніцтва Расейскай Федэрацыі заявіла пра намер размясціць на тэрыторыі Беларусі сваю вайсковую базу, прычым гэта было зроблена ў аднабаковым парадку - «без уліку волі і жадання беларускага народа». «Мы не павінны гэтага дапусціць!» - Падкрэсліваюць аўтары заявы.

Яны перакананыя, што размяшчэнне расейскіх вайсковых аб'ектаў на беларускай тэрыторыі супярэчыць Канстытуцыі, пагражае незалежнасці Беларусі і ўцягвае краіну ў ваеннае супрацьстаянне з еўрапейскімі суседзямі.

Лідары апазіцыі заклікалі грамадзян незалежна ад іх палітычных поглядаў «праявіць нацыянальнае адзінства і беларускі патрыятызм» і прыйсці на народны сход «За мірную, нейтральную Беларусь!» 4 кастрычніка на плошчу Свабоды ў Менску.

Нагадаем, 19 верасня прэзідэнт Расеі Уладзімір Пуцін распарадзіўся падпісаць пагадненне аб расейскай авіяцыйнай базе на тэрыторыі Беларусі. Публічнай рэакцыі на гэта з боку беларускага кіраўніцтва пакуль не было.