Андрэй Саннікаў: Пастанова наконт авіябазы ў Беларусі ўжо прынятая

Захаду трэба слухаць не рыторыку Лукашэнкі, а ацэньваць рэальныя дзеянні ў вайсковай сферы паміж Менскам і Масквой.

Лідар грамадзянскай кампаніі «Еўрапейская Беларусь» Андрэй Саннікаў адказаў на пытанні карэспандэнта Рускай службы «Голоса Америки» аб выхадзе сваёй кнігі «Мая гісторыя. Беларуская «Амерыканка» ці выбары пры дыктатуры», а таксама аб цяперашняй сітуацыі ў Беларусі.

На думку палітыка, за пяць гадоў пасля прэзідэнцкіх выбараў кардынальных зменаў у Беларусі не адбылося. «Тое, што мы бачылі ў 2010 годзе, - жаданне пераменаў і нежаданне бачыць ва ўладзе Лукашэнку - яно захавалася. У 2010 годзе праявы былі больш адкрытыя, сёння гэта ўтоена», - мяркуе Саннікаў.

Лідар «Еўрапейскай Беларусі» ўважае паўторам мінулых памылак спробу краін Захаду ўгаварыць Аляксандра Лукашэнку пайсці на палітычныя і эканамічныя рэформы, а таксама зняцце санкцый у дачыненні да рэжыму.

На ягоную думку, гэта азначае, што «еўрапейцы не намацалі яшчэ стратэгіі стасункаў з Беларуссю». Паколькі заходнія краіны не надаюць сур'ёзнага значэння Беларусі, то сіла Лукашэнкі заключаецца ў слабасці пазіцыі Захаду.

Саннікаў перасцярог ад згортвання дыялогу з дэмакратычнымі сіламі Беларусі: «Калі пачынаецца дыялог Захаду з дыктатурай - чакай больш рэпрэсій. Цяпер рэпрэсіі не спыняюцца. Яны не так бачныя для Захаду. Але такім шляхам ніякіх пастаноў для Беларусі не будзе знойдзена - ні палітычных, ні эканамічных».

Адказваючы на пытанне аб намеры Расеі стварыць вайсковую базу ў Беларусі, Андрэй Саннікаў адзначыў, што важна разглядаць усе вайсковыя падрыхтоўкі на тэрыторыі Беларусі: манеўры, заявы аб патрэбнасці ва ўзбраеннях, здольных дасягаць суседніх краін і авіябаза.

«Думаю, пастанова аб авіябазе ўжо прынятая Крамлём. Лукашэнка робіць выгляд, што супраціўляецца гэтай пастанове, - мяркуе палітык. - Захаду трэба слухаць не рыторыку, якая гучыць у Лукашэнкі, а ацэньваць рэальныя дзеянні, якія адбываюцца ў вайсковай сферы паміж Менскам і Масквой».

Саннікаў скептычна ацэньвае мэтазгоднасць крэдыту МВФ ва ўмовах кіравання Лукашэнкі. «Безумоўна, пры Лукашэнку ўся дапамога фінансавая, эканамічная накіраваная на захаванне рэжыму. МВФ неаднаразова пераконваўся, што ніякія рэформы не значацца ў планах дыктатуры. Сам Лукашэнка выразна сказаў, што ніякіх рэформаў не будзе», - нагадаў палітык.

Напісаная Андрэем Саннікавым кніга «Мая гісторыя. Беларуская «Амерыканка» ці выбары пры дыктатуры» прысвечаная прэзідэнцкай кампаніі 2010 года і таму, што адбывалася пасля гэтага: у зняволенні, у турмах, калоніях. Саннікаў сказаў, што пісаў сваю кнігу адкрыта і, на ягоны погляд, досыць добра тлумачачы тое, чаго хацела дасягнуць на выбарах 2010 года беларуская апазіцыя агулам і, прынамсі, ягоная каманда.

«Вядома, ёсць расчараванне, што гэтая была прапушчаная магчымасць, але ў той жа час - і пра гэта гаворыцца ў кнізе - у 2010 годзе раскрыўся праўдзівы патэнцыял беларускага народа, які здольны на перамены, і гэты патэнцыял будзе запатрабаваны», - адзначыў Саннікаў.

Паводле слоў аўтара, кніга дапаможа людзям убачыць тыя магчымасці, якія ёсць у Беларусі і ў іх саміх, і зразумець, «што кожны чалавек мае вялікае значэнне і ўплыў на сітуацыю».