Украіна адмовілася ад закупак расейскага газу

Пасля заканчэння папярэдняй аплаты «Нафтагаз Украіны» не стаў прадаўжаць закупкі газу ў расейскага «Газпрома».

«Газпром» спыняе пастаўкі газу ва Украіну ў сувязі з вычэрпваннем раней унесенай «Нафтагазам Украіны» ў якасці папярэдняй аплаты сумы», - паведаміў журналістам старшыня праўлення расейскай кампаніі Аляксей Мілер.

«Сёння паводле стану на 10 гадзін раніцы «Нафтагаз Украіны» выбраў раней аплачаныя аб'ёмы расейскага газу. Новай папярэдняй аплаты не паступала. Такім чынам, пастаўкі спыняюцца да паступлення ад украінскай кампаніі новых плацяжоў», - растлумачыў Мілер, паведамляе РБК.

Кіраўнік «Газпрома» асабліва падкрэсліў, што гэта пагражае стабільнасці транзітных паставак расейскага газу ў Еўропу надыходзячай зімой.

Паводле звестак асацыяцыі Еўрапейскіх аператараў падземных газавых сховішчаў (GSE), адпампоўка газу са сховішчаў Украіны пачалася 30 кастрычніка. З тых часоў сукупны аб'ём назапашанага Украінай газу скараціўся прыкладна на 600 млн кубаметраў - да 16,48 млрд кубаметраў.

Раней на гэтым тыдні кіраўнік Мінэнэрга Украіны Уладзімір Дзямчышын заявіў, што ва Украіны няма неабходнасці ў закупцы расейскага газу да канца чацвёртага квартала: «У сховішчах досыць газу, каб яго выкарыстоўваць, не закупляючы».

Нагадаем, што 20 кастрычніка ад расейскага газу адмовіўся Азербайджан.

Азербайджанская метанолавая кампанія AzMeCo прыпыніла закупкі газу ў «Газпрома» праз нерэнтабельнасць.