Турцыя аднавіла перамовы аб уступленні ў Еўрапейскі Звяз
- 26.11.2015, 16:05
- 10,098
Турцыя абвясціла аб аднаўленні перамоў аб далучэнні да Еўразвязу - праз 3 гады пасля заканчэння папярэдняга раўнда.
Аб аднаўленні абмеркавання эканамічнай палітыкі Турцыі з 28 краінамі-чальцамі ЕЗ абвясціў новы турэцкі міністр у справах Еўропы Волкан Базкір, паведамляе BBC.
Турцыя ўпершыню падала заяўку на сяброўства ў 1987 годзе, калі яшчэ існаваў папярэднік Еўразвязу - Еўрапейская эканамічная супольнасць.
Краіна выканала ўсе ўмовы для пачатку перамоў яшчэ ў 2005 годзе, але працэс імкліва забуксаваў праз шэраг абставінаў, сярод якіх - асцярогі за свабоду слова і дэмакратыю, асабліва з прыходам да ўлады прэм'ера-ісламіста Раджэпа Таіп Эрдагана, а таксама стаўленне да рэлігійных меншасцяў, судовыя рэформы і няпростыя стасункі з Кіпрам, які ўваходзяць у ЕЗ.
Увесь гэты час Анкару ў яе імкненні атрымаць сваё месца ў Брусэлі абыходзілі іншыя краіны. Аднак Еўразвяз гатовы заахвоціць Турцыю, каб спыніць плынь мігрантаў у Еўропу.